'રંગારો' - નાર તણો

તારી કાતિલ નજરોની કામણગારી પીંછીનું તો શું કહેવું ? 

છાલક્યાં શર્મિલા શેડો ઝૂકેલ પાપણે,

ને લગાવી લાલિમા બંધ હોઠોના બારણે, 

પુરી દીધી ગુલાબી રંગોળી તે તો ગાલોના ખંજને !

તારી નજાકતભરી અંગ મરોડનારી પીંછીનું તો શું કહેવું ?

વહાવ્યા તરંગિત રંગો લટકાભરી ચાલે, 

ને ઘોળ્યા મોહક વળાંકો પાતલડીની કાયે, 

સજાવી દીધી વાદળી ઘટાઓ તેં તો ઘુમ્મરીયા વાળે ! 

તારી માયાભરી વ્હાલ વરસાવનાર પીંછીનું તો શું કહેવું ?

વરસાવ્યા પ્રેમના રંગો અમ ઉર-આંગણે,

ને ફોર્યાં મીંઠા વેણ કામિનીકેરી જીભે, 

રંગી દીધો સ્નેહ રંગ તેં તો પાલવના છેડે !

આવા કોમળ રંગરૂપ આપનાર એ રંગારાનું તો શું કહેવું !

આપ્યા અગણિત રૂપો એક જ જોબને,

ને ઉતાર્યું અપાર સૌંદર્ય ધરણીતીરે,

કરી દીધું નવલી-નારતણું સર્જન કુદરતનાં ખોળે !