ભજીયાંંદાસ રચિત મેઘદૂતમ્

આષાઢસ્ય પ્રથમ દિવસે વાદળ ગર્જ્યાં આવે

જાવ પ્રિયે રાંધણીયે ! કે,વાલમને ભજીયાં ભાવે,

કોરો લોટ ચણાનો,

  ખીરું થઈ જાવાને તરસે,

બટાકાનાં પતીકાં પર,

     માથાબોળું વરસે !

કાંદા, મેથી, કેળાં, વિધવિધ મીક્સ પણ બનાવડાવે,

જાવ પ્રિયે રાંધણીયે ! કે,વાલમને ભજીયાં ભાવે,

દિવસે દાળવડાં ઓફિસમાં,

       રાતે ઘરમાં ભજીયાં,

મણમોઢે મરચાં દાબંતો,

        પેટ કરાવે કજીયા,

ભવભવનો ભજીયા ભૂખ્યો, તોયે તળ્યાં ચટકાવે,

જાવ પ્રિયે રાંધણીયે ! કે,વાલમને ભજીયાં ભાવે,

દોરીએ લટકેલાં કપડે,

    એનો જીવ લટકતો,

સૂકાશે એ ક્યારે? મૂઓ,

     મેઘ નથી અટકતો,

સૂકાયો રોમાન્સ પ્રિયાનો, ઘર-વરના ચકરાવે,

જાવ પ્રિયે રાંધણીયે ! કે, વાલમને ભજીયાં ભાવે !