సప్తరంగుల హోలీ

సప్తరంగులతో హోలీ పండుగ ఆడెను మన మురళీధర ముకుందం,

మంత్రముగ్ధ రాధిక మానసంలో నింపెను ప్రణయరంగుల వలయం,

బృందావనం నందు ఆనంద వర్ణం చూపంచెను గోపకాంతల నర్తనం,

హర్షిత గోకులవాసులకు అతి అమూల్యం ఈ ప్రియదర్శన ప్రదర్శనం |౧|

అర్చకులు ఉపాసకులు పులకించి పరవశించెను మోసి శ్రీడోలగోవిందుని విమానం,

శ్రీదేవి భూదేవిలతో మధుసూదనుని డోలోత్సవం గ్రామానికి చేసెను శోభాయమానం,

దోలమంటపం దోలవేదిక పైన దేవదేవుని ఫాల్గుణ ఉత్సవం ఒ అనన్య సందర్శనం,

చాచేరి వేషం సువర్ణ వేషంతో అయ్యెను శంఖక్షేత్రము శ్రీజగన్నాథుని దివ్యదర్శనం |౨|

ఫాల్గుణపౌర్ణమి పర్వదినం అత్యంత కమనీయం రమణీయం,

తిరునాళ్లతో ఊరు ఊరు తిరువీధులకు లభించెను అలంకారం,

ఆలకించవలెను తిలకించవలెను జనుల సంతోషం సమాహారం,

భారతీయుల వద్ద చిరంగా ఉండెను ఈ సతతహరిత సంప్రదాయం |౩|