సాగిపో...
సాగిపో...
"ఓ అపరిపూర్ణ ఆజ్ఞాత ఆశాజీవి!!"
ప్రేగు తెంచి, కన్ను తెరచి, గుక్క పెట్టి, గంతులేసింది మొదలు
నూలు కప్పి, చాపచుట్టి, కర్ర కట్టి, కట్టేపై కాల్చే వరకూ
సాగే జీవిత ప్రయాణమే తాత్కాలికమైనప్పుడు ఆ తాత్కాలికపు ప్రయాణంలో ఎదురయ్యే
సంతోషం - కోపం,
ప్రేమ - ద్వేషం,
సాయం - మోసం,
బాధ - బాధ్యత,
ఇష్టం - కష్టం,
అందం - బంధం లాంటి అలంకారాలన్నీ తాత్కాలికమేకదోయి.
యదలోని భావాలు ఆశగా నింగికే నిచ్చెన వేసినా..
ఎగిసిపడకోయి,
మదిలోని ఆలోచనలు బరువుతో పుడమికే పరిమితం చేసినా.. కృంగిపోకోయి,
సవాలు లాంటి ప్రతి ఒడిదుడుకు ఒక అనుభవమే కదోయి,
ఆ అనుభవాలు నేర్పిన పాఠాలే పరిపూర్ణ జీవితానికి
అభివృద్ధి సోపానాలుగా మలుచుకోవోయి,
ధృడంగా నిలబడవోయి,
ముందుకు సాగిపోవోయి..
పట్టుదలతో ఛేదించవోయి...
సత్య పవన్