మనిషి ఉనికి

యుద్ధాలల్లో నేలకోరిగిన శిరస్సులను చూడు

అణు బాంబుల పేలుళ్లలో మరణించి నోళ్ళనుచూడు

మతఛాందస వాదుల మంటల్లో ఆహుతై నోళ్ళను

కరువు రక్కసికి బలియైన దీనులను చూడు

వైరస్ కోరల్లో ఊపిరి వొదిలి నోళ్ళను చూడు

విషవాయువుల లీకేజీలో చనిపోయినోళ్ళను చూడు

శ్మశాన వాటికల్లో జీవన సారమంత ఉంది చూడు

అనంత విశ్వంలో శూన్యంలో కలిసిపోయిన

అనుభవాల మూటలు విప్పిచూడు

ప్రకృతి ప్రళయాలకు మహాసముద్రంలో

మాయమయిన మనిషి జ్ఞాపకాలను వలవేసి పట్టు

భూకంపాలకు భూస్థాపితం అయిన జ్ఞానాన్ని

శిథిలాలలో వెదికి చూడు

ఆ నిశీధిలో నిర్మలమైన ఆకాశం వైపు చూడు

నిశ్శబ్దం బోధించే జీవిత పాఠాలు ఎన్నో

అర్ధించే చేతులు ఎన్నో

ఎదురు చూసే కన్నులు ఎన్నో

అర్తనాదలతో రోధించే గుండెలు ఎన్నో

కాలక్రమంలో కనుమరుగైపోయిన 

అభాగ్యుల, అనాధల, అమాయక జీవితాలు ఎన్నో

నిస్తేజం నిన్ను అవహించిన ప్రతిసారి

ఈ జీవితం నిర్వేదం అనుకొన్నప్పుడు

విరక్తితో ప్రాణం తీసుకోవాలనుకున్నప్పుడు

గతమంత తవ్వి చూడు

మానవత్వపు పరిమళాలు గుబాలిస్తాయి

రాజ్యాలను కోల్పోయిన మనిషి

సర్వ సంపదలను పోగొట్టుకున్న మనిషి

అన్ని కోల్పయినా మనిషి

జీవించాలనే ఆశను మాత్రం కోల్పోలేదు

అందుకే గతాన్ని గురించి బాధపడకు

భవిష్యత్ గురించి బెంగ పడకు

వర్తమానంలో విచారించకు

ఆత్మనిబ్బరంతో జీవించడం మొదలుపెట్టు