కరుణయే సౌందర్యం

మరిగే ద్వేష రక్త కాసారాలు

మరుగున పడి విధికి చిక్కిన చిన్ని ప్రాణాలు

వీధి బాలలుగా మారిన వారు

అతను గురువై అక్షరాలు దిద్దించాడు

చెప్పలేని బాధలు కన్నీటి పరదాల మాటున దాచి

సమాజం నుండి బహిష్కృతమైన అభాగినులకు

ఒక ఆసరా కల్పించి వారికి వెలుగు బాట చూపించాడు

దివ్యాంగుల జీవితాన్ని మెరుగు పరిచేందుకు

కొత్త ఆవిష్కరణల వైపు అడుగులు వేయాలని

సమాజంలోని యువతను ప్రేరేపించాడు

స్వచ్ఛంద సంస్థల సహాయంతో

ప్రకృతి వైపరీత్యాల బాధితులకు

ఒక నీడను ఏర్పరిచేందుకు తపన పడ్డాడు

నిరాశలో కూరుకుపోయిన వారికి ఒక మంచి మాటగా

వేదనలో ఉన్న వారికి సాయమందించే చల్లని చేయిగా

అతను ముందుకు నడిచాడు

అతని కరుణయే సౌందర్యం కదా

ఆ కరుణ నీలోనూ ఉంది

కాస్త చుట్టూ చూడు

ఆ అలజడి సద్దుమణిగి

నీలోని నిన్ను కలుసుకో