ఎద్దుతో పోటీ
ఎద్దుతో పోటీ
మేలు జాతి వృషభమే
చూడగానే మెచ్చుకోలు
రంగు రంగుల వస్త్రం కట్టి
తీరుగా అలంకరణ చేసి
మైదానంలో వదిలారు
పోట్ల గిత్తకు పోటీగా
పరుగెత్తే వాడు ఎవడని వెతగ్గా
బరిలోకి దిగాడు ఒకడు
రాతి పనిముట్లతో చెక్కినట్లున్న దేహంతో
గట్టిగా శ్వాస విడిచి
కాలు దువ్వాడు
ఎద్దు గిట్టలు మట్టిని కదిలించి
దుమ్మును రేగ్గొట్టగా
అతను ముందుకు కదిలాడు
ఒక్క కొమ్ము దెబ్బకు
అతడి ఛాతీ పైన రక్తం చిమ్మింది
ఆది నుంచీ అదుపు చేస్తున్న భావన
అతడిలోని ఆదిమానవుడిని రెచ్చగొట్టి
ముందుకు ఉరికేలా చేసింది
తెగింపుతో ఒడుపుగా పట్టి
ఎద్దును అధిరోహించి
కొమ్ములు పట్టుకుని సవారీ చేసాడు
ప్రేక్షకుల్లో స్పందన
పందెం రాయుళ్ల జోరు
అతని ప్రియురాలు నిస్సహాయంగా కూర్చుంది
జంతువులా మారిన మనిషిని చూసా
అతనిలో పోరాడే శక్తిని చూసా
లేక ఆ జంతువుల క్రీడ అతణ్ణి
ఏదో రోజు బలి కోరుతుందనా
ఎవరికి తెలుస్తుంది..