ஒரு மரத்தின் சோக காதல் கவிதை

உமது காதலின் உன்னதம் சொல்ல

எம்மைக் காயப்படுத்தவும் வேண்டுமோ ?

கீறினீர் .... காயப்படுத்தினீர் ....

கூர் ஆயுதம் கொண்டே

எம் மேற் தோல் பட்டைகளை சிதைத்தீர் !

புண்பட்ட என் மேனியில்

இதயம் வரைந்து கூர் அம்பும் துளைத்தீர் !

உங்கள் காதலுக்கு அடையாளமாய்

நான் பச்சை குத்திக் கொண்டேன் !

உமது காதல் காலம் கடந்தும் நிலைத்ததோ -

யாமறியேன் பராபரமே !

ஆனால் -

நீவிர் ஏற்படுத்திய காயமும்

காயம் தந்த வடுக்களும்

என்மேல் நிலைத்து விட்டதே !

கண்ணீருடன் தன் சோகம் தனை

இயம்புகிறது - ஓர் மரம் !