ହୋଇଗଲି ତୁମ ସାଥୀ

ତୁମରି ଗଳାରେ ଯେଉଁଦିନ ମୁହିଁ

ପିନ୍ଧେଇଲି ବରମାଳା ,

ସେଇଦିନ ଠାରୁ ଭୁଲିଗଲି ନାଥ

ବାପଘର ଖେଳା,ଲୀଳା ।

ଏ ଜନମ ନାହିଁ,ସବୁ ଜନମକୁ

ହୋଇଗଲି ତୁମ ସାଥୀ ,

ସୁଖରେ,ଦୁଃଖରେ ତୁମ ନିକଟରେ

ଛାଇଭଳି ଥିବି ନିତି ।

ରାଜା ହେଲେ ତୁମେ ରାଣୀ ହେବି ମୁହିଁ

ରଙ୍କ ହେଲେ ହେବି ଦାସୀ ,

ଦଶଦିଗ ପାଳ ସାକ୍ଷୀ ରଖି ପରା

ମନରେ ଥିଲି ମନାସି ।

ଅକ୍ଷରେ ଅକ୍ଷରେ ପାଳି ଆସୁଅଛି

ସେବେଠାରୁ ଏହି ପଣ ,

ରାଜପୁର ସୁଖ,ବନବାସ ଦୁଃଖ

ଭାଙ୍ଗିନାହିଁ ମୋର ଟାଣ।

ତୁମରି ପାଶରେ ଅବା ଥିଲେ ଦୂରେ

ନିନ୍ଦିନାହିଁ କରମକୁ ,

ଅତି ଆଗ୍ରହରେ ପାଳନ କରିଛି

ପତିବ୍ରତା ଧରମକୁ ।

ସବୁବେଳେ ତୁମ କୁଶଳ ଇଛିଚି

ଭୁଲିଯାଇ ନିଜକଥା ,

ଅଜାଣତେ ଦୋଷ ହୋଇଯାଇଥିଲେ

କ୍ଷମା କରିଦେବ ଧାତା ।।

ବି.ନିରୁପମା

ମାମୁରିଆ, ଛେଣ୍ଡିପଦା,ଅନୁଗୋଳ।