ନିଷ୍ଠୁର ପ୍ରିୟତମ

ଭଙ୍ଗା ଆଇନାରେ  ମୁହଁକୁ ଦେଖିଲେ

    ମୁହଁଟା ଲାଗୁଛି ମିଛ

ଆଲୁଅ ଅନ୍ଧାର    ଦୁନିଆ ଖେଳରେ

    କିଏ ଆଗ କିଏ ପଛ ।

ଆଇନା ଆଖିରେ  ଲୁହର କାହାଣୀ

    ଟୁକୁରା କାଚରେ ଲେଖା

କିଏ ଭାଙ୍ଗିଥିଲା ହୃଦୟ କାଚକୁ

    ହୋଇକି ପାରିବ ଯୋଖା ?

ଆଖିର ସପନ    ଆଖିରେ ଗୋପନ 

     ମନ ଫାଙ୍କ ତଳେ ଦିଶେ

ମରମ ବେଦନା     କାଚକି କହିବ

     ମୁହଁକୁ ଦେଖିସେ ହସେ ।

ଅଜବ ଦୁନିଆ    ଗଜବ ସମୟ

    ନିୟତିର ପରିହାସ

କାହା ପାଇଁ ସଜା   ଫୁଲର ପାଲିଙ୍କି 

      କାହାର କାହାଣୀ ଶେଷ ।

କାଚ ଖଣ୍ଡ ଧରି     ରାଧିକା ଦେଖୁଛି

    ହୃଦୟର ଅବଶେଷ

ଲୁହ ଢଲଢଳ      ଆଖିର କୋଣରେ

    ଛାତି ତଳେ ଦୀର୍ଘଶ୍ଵାସ ।

ଉଜୁଡା ଯମୁନା     ଘାଟର ଚାନ୍ଦିନୀ

      ନିଛାଟିଆ ଜହ୍ନରାତି

ହସଫୁଲ ଝରେ     ବଧୁଲି ଓଠରୁ

      କିଏ ହେବ କାହା ସାଥି ।

ଖିଲି ଖିଲି ହସେ    ଆଇନା ର କାଚ

       ଅନ୍ଧାରକୁ କରି ପଛ

ରାଧିକା ମଥାର     ସିନ୍ଦୂର ରେ ଲେଖା

      କେତେ ସତ କେତେ ମିଛ ।