ନବବର୍ଷ ପାଇଁ ପଦେ
ନବବର୍ଷ ପାଇଁ ପଦେ
ନବବର୍ଷ ତୁମେ ଆସ ନାହିଁ ଜମା
ଅନ୍ତରଙ୍ଗ ଶତ୍ରୁ ପରି ,
ଉଜୁଡା ବର୍ଷର ବିକ୍ଷୁବ୍ଧ ସଙ୍ଗୀତ
ଗାଇବନି ସୁର ଧରି ।
ଘନ ତମିସ୍ରାରେ ସଂଶୟ ଘେରରେ
ବିତିଛି ବିଗତ ବର୍ଷ ,
କେତେ ଯେ କାହାଣୀ ଅଧା ରହିଗଲା
ମୁଖରୁ ଲିଭିଛି ହର୍ଷ ।
ଶୁନ୍ୟ ଗୃହାଙ୍ଗନେ ଶୁନ୍ୟ ସୀମନ୍ତିନୀ
ଶୂନ୍ୟ କ୍ରୋଡ଼ ପିତା, ମାତା ,
ଅଦୃଶ୍ୟ ଘାତକ ବଇରୀ ସାଜିଛି
ଅଧା ରଖିଗଲା କଥା ।
ପାର୍ଥିବ ଜଗତ କରି ଇତଃସ୍ତତ
ସମୟର ଅଟ୍ଟହାସ,
ଜୀବନ ପ୍ରଦୀପ ନିମିଷକେ ଲିଭେ
ବିଧିର କି ଅଭିଶାପ !!
ଯଦି ଆସୁଅଛ ଆଗମନ ତୁମ
ହେଉ ଶୁଭ ମାଙ୍ଗଳିକା,
ନିରାଶାର ଘନ ଅନ୍ଧକାରେ ତୁମେ
ସମ୍ଭାବନା ଦୀପ୍ତ ଶିଖା ।
ଜୀବନ ପାଲଟୁ ଜୀବନ୍ତ ରାଗିଣୀ
ନିଃଶଙ୍କ ପବିତ୍ର ଧାରା ,
ଉଲ୍ଲସିତ ବିଶ୍ୱ କଲ୍ଲୋଳିତ ପ୍ରାଣ
ପ୍ରାଚୁର୍ଯ୍ୟରେ ହେଉ ଭରା ।
ନବବର୍ଷ ତୁମେ ହୁଅ ଆବାହନୀ
ଶାନ୍ତି ସଂପ୍ରୀତିର ଦୂତ ,
କ୍ଳେଶ ଦୂର ହେଉ ଏ ଧରା ଧାମରୁ
ଏତିକି ନିବେଦ୍ୟ ମାତ୍ର ।