પપ્પાની દીકરી ગઈ પપ્પાને મળવાં
પપ્પાની દીકરી ગઈ પપ્પાને મળવાં
પપ્પાની દીકરી ગઈ પપ્પાને મળવાં,
રડતી રડતી તડપતી પપ્પાને મળવાં.
ઘર તો જાણે સુનું 'તું દરવાજા રડતાં,
જલ્દી જલ્દી પહોંચી પપ્પાને મળવાં.
પકડીને હાથ એ ઢગલો થઈ ગઈ ત્યાં જ
જોઈને હેબકાઈ ગઈ પપ્પાને મળવાં.
ફીકી ને બોલતી એ આંખો પપ્પાની,
બચપન એ શોધવાં ગઈ પપ્પાને મળવાં,
"પપ્પા, લો દીકરી આવી પરદેશથી,
અંતર લાંબાં એ કાપી પપ્પાને મળવાં,
પપ્પા તાકી રહ્યા ખાલી આંખોથી બસ,
આ છે કોણ બેન આવી પપ્પાને મળવાં,
દિલમાં ઊંડુ કશું ખૂંચી ગયું, કંપી ગઈ,
"હું છું તમ અંશ આવી પપ્પાને મળવા."
પંખી ઊડી ગયું પપ્પા સિધાવ્યા પરલોક,
'સપના' ક્યારે જશે ઈ પપ્પાને મળવા.