રાતનો ગર્ભ

રાતના ગર્ભમાં સવાર જેવું કંઈક સળવળે

અંધારું ફંફોળતા આખે આખો સૂરજ મળે

એની આંખોના રણમાં હતું તરસનું સરનામું

ને હર ક્ષિતિજે મૃગજળના મને સમંદર મળે

આ અડાબીડ જંગલમાં સન્નાટાની ચિચિયારી

જે સાંભળી જાય એને એક ગાતું વૃંદાવન મળે

એક સિતારાની શોધ ને આ મૌન અનંત આકાશ

ઉમ્મીદથી જરાક આગળ આકાશગંગાઓ મળે

બે શબ્દો વચ્ચેની આ ખામોશી માં એક જ ડૂબકી

ને આ મરજીવાને મોતી જેવી કવિતાઓ મળે

જેની"પરમ"પલકોમાં રુદન ને હાસ્યનો સંગમ

એને પલ પલ આનંદ અર્પતું"પાગલ"પન મળે