તુજ આગમનનો ભાસ

તારા વગર સંગીતના સૂર સાતેય ઉદાસ છે

તું દૂર મુજથી હોવા છતાંય રૂદિયાની પાસ છે

વાંસળી સમજી ઉઠાવી લે એકવાર મુજને તું

પછી મારી આ જન્મે બીજી કોઈ જ ક્યાં આશ છે

આમ તો સતત વહે શ્વાસ બની તું જ મુજ મહીં

સ્વર બની પ્રગટે વાંસળીએ એ ફૂંક કંઈ ખાસ છે

જાતને સૂકવી કાળજું છેદાવી બની છે આ તાસીર

તારી યાદોના સહારે શબ્દોમાં કેવો મૌન પ્રાસ છે

"પરમ" તારી પાછળ ભટકું "પાગલ" થઈ યુગોથી

હર પગરવમાં તેથી જ તુજ આગમનનો ભાસ છે