ତୁମର କ'ଣ ମନେ ପଡୁନାହିଁ

ତୁମର କଅଣ ମନେ ପଡୁନାହିଁ

ପଛକଥା କେବେ ଥରେ

କେମିତି ପାସୋରି ପାରିଲ ହେ ମିତ

ଥିବା ସରାଗ ମୋଠାରେ ?

ସାଥୀ ହୋଇ ଦୁହେଁ କେତେ ବୁଲିଛନ୍ତି

ଆମରି ପାହାଡ଼ ବଣ

ଭଇଁଚ କୋଳିରେ ତୁମରି ଆଦର

ଖାଇ ଖୁସି କର ମନ ।

ନାଚିଛନ୍ତି କେତେ ଝରଣା ପାଣିରେ

ପଡ଼ି ଉଠି କୋଳାକୋଳି

ଆମ୍ବ ପଣସର ସମ୍ଭାରରେ ବୁଡ଼ି

ଖେଳିଛନ୍ତି ରଜଦୋଳି ।

ଆମ ଗାଆଁ ପରା ତୁମକୁ ସପନ୍ଦ

ଅତି ଭଲ ପାଅ ମୋତେ

କିପରି କହୁଛି ମନଟି ତୁମର

ଛାଡ଼ି ରହିବାକୁ ସତେ !

ପାଠ ପଢ଼ିବାକୁ ଯାଇ ବିଦେଶକୁ

ଭୁଲିଗଲ ପୂରା ମୋତେ

ହେଲେ ମୁଁ ନିଇତି ଅତୀତ କୋଳରେ

ହଜଇ ତୁମ ସହିତେ ।

ଆସିବ ଆସିବ ବୋଲି କଥା ଦେଇ

କଟେ ଦିନ, ମାସ, ବର୍ଷ

କି କେ ନୂଆ ସାଥୀ ବାଟ ଓଗାଳନ୍ତି 

ଦେଇ ପୀରତି ପରଶ ?

ବିଭୁ ଶ୍ରୀପୟରେ ବିନତି ମୁଁ କରେ

ନିଇତି ତୁମ ମଙ୍ଗଳ

ଯେଉଁଠି ଯେମିତି ଥାଅ କୃପାବାରି

ଢାଳୁଥାନ୍ତୁ ଆଖଣ୍ଡଳ ।।