ସନ୍ଧ୍ୟା ଦୀପ

ପକ୍ଷୀ ଦଳ ଦଳ ଗଲେଣି ଉଡି 

ସୂରୁଜ ଗଲେଣି ପଶ୍ଚିମେ ବୁଡି 

ଆସିଲାଣି ସନ୍ଧ୍ୟା କାଳ 

ଗୋଡ଼ ହାତ ଧୋଇ ଆସରେ ପିଲେ 

ସନ୍ଧ୍ୟା ଦୀପଟିଏ ଜାଳ ll

ପ୍ରଭୁଙ୍କୁ ସୁମରି ଭକତି ଚିତ୍ତେ 

ମନ ସ୍ଥିର କରି ହୃଦୟଗତେ 

ପାଠ ପଢ଼ ସବୁ ବସି 

ଜ୍ଞାନ ଅରଜନେ ଯୋଗ୍ୟତା ଭାଜନେ 

ଜୀବନ ଉଠିବ ହସି ll

ସାର୍ଥକ ସଫଳ ଜୀବନ ପାଇଁ 

ବିଦ୍ୟା ପ୍ରୟୋଜନ ନିଶ୍ଚେ ହୁଅଇ 

କରନାହିଁ ଜମା ହେଳା 

ବିଦ୍ୟା ଆଭୂଷଣେ ମଧୁମୟ ହେବ 

ଜୀବନର ମୁଖଶାଳା ll

ବାଲ୍ୟକାଳୁ ବିଦ୍ୟା କର ସାଧନ 

ସ୍ଥିତପ୍ରଜ୍ଞ ହେବ ଏଇ ଜୀବନ 

ବିଜ୍ଞତା ହୋଇବ ବୃଦ୍ଧି

କର୍ମକ୍ଷେତ୍ରେ ଅବା ଜୀବନ ଚର୍ଯ୍ୟାରେ 

ସବୁଠି ଲଭିବ ସିଦ୍ଧି ll

ଭବିଷ୍ୟତ ହେବ ଉଜ୍ଜଳମୟ 

ବିଦ୍ୟା ଅରଜନେ ରଖିଲେ ଲୟ 

ବେଳ ଥାଉଁ କର ଯତ୍ନ 

ହୀରା ନୀଳା ମୋତି ମାଣିକଠୁ ବଳି 

ଅଟେ ଏ ଅମୂଲ୍ୟ ରତ୍ନ ll