ଲାଇବ୍ରେରୀ
ପ୍ରୋଫାଇଲ୍
ମାଆ ଓ ମମତା
ମାଆ ଓ ମମତା
ମାଆ ମମତାର ଅସୀମ ସ୍ନେହର
ଅବାରିତ ବାରିଧାରା
ବାଣୀ ମଧୁଭରା ବାତ୍ସଲ୍ୟରେ ଭରା
ପବିତ୍ର ପ୍ରେମ ପସରା ll
ଜନ୍ମଧାତ୍ରୀ ମାତା ପ୍ରଥମ ବିଧାତା
କଲ୍ୟାଣକାରୀ ଜନନୀ
ପାଳନ ତାରଣ ସଙ୍କଟ ହରଣ
ମାଆ ମଙ୍ଗଳକାରିଣୀ ll
ସୃଷ୍ଟିର ନିର୍ମାତା ପ୍ରକୃତିରେ ମାତା
ପୂଜନୀୟା ବନ୍ଦନୀୟା
ଶିଶୁ ପାଇଁ ମାଆ ସହେ ଝଡ଼ଝଞ୍ଜା
ମନ ତାର ନମନୀୟା ll
ରୁଧିର ଝରାଇ ଅମୃତ ପିଆଇ
ଦୁଃଖ ବୁଝି ସନ୍ତାନର
ଖାଦ୍ୟ ବସ୍ତ୍ର ଦେଇ ଆନନ୍ଦରେ ବାନ୍ଧି
ବଢାଏ ଶିଶୁକୁ ତାର ll
ଜହ୍ନକୁ ଦେଖାଇ କୋଳରେ ବସାଇ
ଖୁସି ପାଇଁ ଗୀତ ବୋଲେ
ହାତ ଧରି ପଥେ ଚାଲିବା ଶିଖାଏ
ପ୍ରେମରେ ଚୁମ୍ବନ ବୋଳେ ll
ଖାଦ୍ୟ ନ ରୁଚିଲେ କଳରେ ଜାକିଲେ
ମାଆର ହୃଦୟ କାନ୍ଦେ
ଦାଣ୍ଡରେ ବୁଲାଇ ପଶୁଙ୍କୁ ଦେଖାଇ
ଖାଦ୍ୟକୁ ଖୁଆଇ ଦିଏ ll
ଧୂଳି ଧୂସରକୁ ଝାଡେ ଶରୀରକୁ
ପିନ୍ଧିବା ଲୁଗାରେ ତାର
ଶିଶୁ ମଳ ମୂତ୍ର ସଫା କରେ ସେତ
ନଥାଏ ମନେ ବିକାର ll
ବେଳ ଫେରିବାର ହୋଇଲେ ଉଛୁର
ଦୁଆରେ ଜଗିକି ବସେ
ଆସିଲାଣି ଧନ ଆନନ୍ଦେ କହିଣ
କାନିରେ ମୁହଁ ଆଉଁସେ ll
ସିଲଟ ଖଡ଼ିରେ ଅକ୍ଷର ଚିହ୍ନାଏ
ପ୍ରଥମ ଗୁରୁସେ ଜାଣ
ଗୀତ ଗପ କହି ପଢ଼ାଏ ସେ ବହି
ସ୍ନେହ ବୋଳା ଆକର୍ଷଣ ll
ରୋଗ କଷ୍ଟ ବେଳେ ପାଶେ ସଦାବେଳେ
ବସିକରି ସେବା କରେ
ଆଦରେ ତାହାର ପୀଡା ହୁଏ ଦୂର
ଦୃଢ଼ ତାର ମମତାରେ ll
ବିପଦେ ସମ୍ପଦେ ତାର ପରାମର୍ଶେ
କର୍ମମାନ ହୁଏ ସ୍ଥିର
ସନ୍ତାନ ପାଇଁ କି ଅନିଦ୍ରା ହୋଇକି
ଅବଶ ହୁଏ ଶରୀର ll
ଅନାବିଳ ସ୍ନେହ ମାତୃତ୍ୱର ମୋହ
ମହିୟସୀ ଗର୍ଭଧାରୀ
ନିଃସ୍ୱାର୍ଥ ଭାବନା ଭବିଷ୍ୟ କାମନା
ସନ୍ତାନର ଶୁଭକାରୀ ll
