ଦୀପର ଆଲୋକେ ସଜାଅ ଘର
ଦୀପର ଆଲୋକେ ସଜାଅ ଘର
ହୁଏ ଚକ୍ଷୁ ମୂଲ୍ୟହୀନ ଘନ ତମସାରେ ଜାଣ
ଆଲୋକ ଗୁରୁତ୍ୱ ବୁଝେ ପରା ନୟନ
ଏକ କ୍ଷୁଦ୍ର ଦୀପ ଶିଖା କରେ ଅନ୍ଧକାର ଫିକା
ଦେଖିବା ସହାୟ କରେ ଆଭା ବାଣ୍ଟିଣ l
କେତେ ଅଛି ମହାନତା ଦିବ୍ୟ ଗୁଣେ ବିଭୂଷିତା
ଅନ୍ୟ ପାଇଁ ଜଳେ ନିଜେ ଛୋଟ ସଳିତା
କେତେ ପୁଣ୍ୟ ଧର୍ମ କା6ର୍ଯ୍ୟ ପ୍ରତି ଶୁଭାଶୁଭ କର୍ମେ
ପବିତ୍ର ଦୀପକୁ ଜାଳୁ ନୁଆଇଁ ମଥା l
ପ୍ରଭୁଙ୍କର ନିକଟରେ ଦୀପ ଦେଇ ଆବେଗରେ
ଆଶିଷ ମାଗୁଛେ ସର୍ବେ ପ୍ରଣତି ଦେଇ
ଆଜି ସେହି ଦୀପାବଳି ଆନନ୍ଦେ ଦୀପକୁ ଜାଳି
ଦୀପର ଆଲୋକେ ଘର ଦେବା ସଜାଇ l
ଅଜ୍ଞାନ କୁ କରି ଦୂର ଜ୍ଞାନ କୁ କରି ଆଦର
ଅନ୍ତର କାଳିମା ଆମେ ଦେବା ଜଳାଇ
ସେବା, ତ୍ୟାଗ କରି ବ୍ରତ ଗଢିବା ଆମ ଚରିତ୍ର
ସଂସ୍କାରେ ବ୍ୟକ୍ତିତ୍ୱ ତୋଳି ଯିବା ଆଗେଇ l
ସୁବର୍ଣ୍ଣ ପରି ସୁନ୍ଦର ସଦା ହେଉଯେ ଅନ୍ତର
ସତ୍ୟ ସାଧୁତାରେ ରଖି ନିଜର ମତି
ସଳିତାର ଗୁଣ ଧରି ଧର୍ମ ପଥେ କର୍ମ କରି
ଦେଇ ମନ ବିଭୁ ପ୍ରେମ ଦର୍ଶନେ ମାତି l