କାଶତଣ୍ଡୀ ହସେ ପ୍ରକୃତି କୋଳରେ

କାଶତଣ୍ଡୀ ହସେ ପ୍ରକୃତି କୋଳରେ

     ଋତୁରାଣୀ ବିରାଜନ୍ତି ଯେବେ ଧରାରେ

ସବୁଜ ସୁନ୍ଦର ତରୁଲତା ପ୍ଲାବିତ

   କେଡେ ମନୋହର ଦିଶେ ସତେ ଖରାରେ  l

ଗ୍ରୀଷ୍ମ ଋତୁ ପରେ ବର୍ଷା ପ୍ରତ୍ୟାଗମନେ

      ଋତୁପରେ ଋତୁ ଗୋଟି ଗୋଟି ଆସେ

ବିବିଧ କୁସୁମେ ଋତୁ ରାଣୀ ସାଜେ

        ଶରତ ଆଗମନେ ଧରଣୀ ହସେ   l

ମୃଦୁ ମଳୟ ସତେ ଯାଉଛି ବହି

       କାଶତଣ୍ଡୀ ଦେହେ ସତେ ସ୍ପର୍ଶ ପାଇ

ହଲି ଝୁଲି ନାଚେ କାଶତଣ୍ଡୀ ଆଜି

        ଦେବୀଙ୍କର ସ୍ୱାଗତ ପାଇବା ପାଇଁ  l

ନଈହସେ ମନେଭରି କେତେ ଆଶା

      କାଶତଣ୍ଡୀ ଦୋଳିଖେଳେ ସମୀରଣେ

ସତେକି ଯୌବନ ପ୍ରୀତି ଭରି ଅଛି

        ସାଇତି ଥିଲାକି ସେ ତାହାରି ମନେ  l

ଶ୍ୱେତ ଶାଢ଼ୀ ପିନ୍ଧି କାଶତଣ୍ଡୀ ଚାହେଁ

       ହେବା ପାଇଁ ତାଙ୍କ ପାଦ ପୂଜାରାଣୀ

ମନ ଆନମନେ ସ୍ୱାଗତ କରେ ସେ

       ନେଇ କେତେ ହୃଦୟ ଭରା ଚାହାଣି  l

ମନେ ତା ଭରିଛି କୁଆଁରୀ ସପନ

       ମାଆଙ୍କୁ କରିବ ଧୂପଦୀପ ଦେଇ ଅଳି

ପରିପୂର୍ଣ୍ଣ ହେବ ସତେକି ତା ଜୀବନ

        ଶ୍ରଦ୍ଧା ମନରେ ଆଶିଷ ଦେବ ଢାଳି  l

ଖିଲି ଖିଲି ହସେ କାଶତଣ୍ଡୀ ଫୁଲ

        ଆନନ୍ଦ ମୁଖରିତେ ବିଭୋର ହୋଇ

ଫୁଲ ବଉଳବେଣୀ ଗାଏସେ ଗୀତ

         ସବୁରି ମନକୁ ହସ ଖୁସି ନେଇ   l

ଧବଳ, କୋମଳ ଅତି ସୁରଞ୍ଜିତ

         ରୂପ ମାଧୁରୀର ପ୍ରସ୍ଫୁଟିତ ଶୋଭା

ଶରତ କାଳରେ ଫୁଟି ଉଠେ ଧୀରେ

           ଆନନ୍ଦ ହୋଇ ଅନୁପମ ଆଭା  l

ପାପ ନାଶିବାକୁ ଆସନ୍ତି ଅମ୍ବିକା

       ଶରତ ଋତୁ ଦେଇ ଯାଏ ସେ ବାର୍ତ୍ତା

ମାଂ ସିଂହ ବାହିନୀ, ଜଗତ ଜନନୀ

      ଜଗତରେ ଲିଭାଇବେ ପାପ ର ସର୍ତ୍ତା  l