ଚୋରି ଯେବେ କରିବୁ

    ଚୋରି ଯେବେ କରିବୁ

    ଚୋରି କରରେ ମନ

ଏମିତିକା ଧନ  କରିବୁ ହରଣ

 ସୁଖେ ଥିବୁ ଥିବାଯାଏ ଜୀବନ ।

    ଦେଇ କ୍ଷୀର ସର ଲବଣୀ

    ସାଇତିଛି ଯଶୋଦା ରାଣୀ

ସୁଦାମ ରୂପରେ  ଯିବୁ ତୁ ଗୋପ୍ଯରେ

    ଚୋରାଇନେବୁ ତା' କାଳିଆଧନ ।

    ଚୋରି ଯେବେ କରିବୁ।

    ବୃଷଭାନୁସୁତା ସୁନ୍ଦରୀ

    ବଳି ଶ୍ରଦ୍ଧା ପୀରତି ଡୋରି

ରଖିଅଛି ବାନ୍ଧି  ହରିବୁ ସେ ନିଧି

   ଯାଇଥିବେ ଯେବେ ଯମୁନା ସ୍ନାନ ।

    ଚୋରି ଯେବେ କରିବୁ।

ଶୁଣିଥିବୁ ଯମୁନା କୂଳେ

   ବିହେ ଲୀଳା ଗୋପୀଙ୍କ ମେଳେ

ଗୋପୀ ପଦରଜ  ମହାଧନେ ହେଜ

    ହରିବୁ ସେ ତ୍ରିତାପକୁ ଚନ୍ଦନ ।

    ଚୋରି ଯେବେ କରିବୁ।

    ବୃନ୍ଦାବନେ ପ୍ରସିଦ୍ଧ ଚୋର

    ତୋ ଉପରେ ରଖେ ନଜର

ଯାହା ଚୋରାଇବୁ  ତାକୁ ଟେକି ଦେବୁ

    ମୂଲ ଦେଇପାରେ ମହାନିର୍ବାଣ ।

    ଚୋରି ଯେବେ କରିବୁ।