ସମ୍ପର୍କର ଶେଷ ପ୍ରଶ୍ନ
ସମ୍ପର୍କର ଶେଷ ପ୍ରଶ୍ନ
ହୃଦୟର କଥା କାଗଜ କଲମେ
ହୁଏନାହିଁ ପ୍ରିୟା ଲେଖି
ଲେଖୁଛି ତଥାପି ନିଶ୍ଚୟ ପଢିବ
ବିଶ୍ବାସ ମୁଁ ଅଛି ରଖି ।
ରହୁଛି ପ୍ରବାସେ ନିଜ କର୍ମକ୍ଷେତ୍ରେ
ଆଜୀବିକା ଉପାର୍ଜନେ
ଲାଗେ ନାହିଁ ଭଲ ତୁମ ବିନା ମନ
ଏକାକୀ ସୁଦୂର ସ୍ଥାନେ ।
ଗୃହେ ଭଲମନ୍ଦ କର୍ତ୍ତବ୍ଯ ଜଞ୍ଜାଳ
ମରମ ବ୍ଯଥା ବେଦନା
ଲାଗେ ଦୁଃର୍ବିସହ ମନ ଦହଗଞ୍ଜ
ରାତ୍ରୀ ହୁଅ ନିଦ୍ରାହୀନା ।
ଲେଖିଥିଲ ପ୍ରିୟେ ରୋଷ ବହି ଚିଠି
ନୀରବେ ଝରୁଛି ଲୁହ
ଭାବୁଛ କି ଲାଭ ଜିଇଁବା ଜୀବନ
ତୁଟି ଯାଉଅଛି ମୋହ ।
ଦୟାଳୁ ଈଶ୍ବର ଦେଇଛନ୍ତି ଦୁଃଖ
କରିବେ ଦିନେ ସେ ଦୂର
ଗରିବ ଅବଶ୍ଯ କରିବ ସଂଗ୍ରାମ
ଛାତିକୁ କରି ପଥର ।
ଜୀବନ ନୁହଁଇ ଅଳୀକ ସ୍ବପନ
ମାତ୍ର ଖେଳ ବାଲିଘର
ଭାବର ବନ୍ଧନ ମିଳନେ ହୃଦୟ
ଜୀବନ ସତ୍ଯ ସୁନ୍ଦର ।
ଦେଉଛି ଉତ୍ତର ଏଥର ଡାକରେ
କରୁଅଛି ଅନୁରୋଧ
ହେଉ ଶେଷ ପ୍ରଶ୍ନ ନତୁଟୁ ବିଶ୍ବାସ
ସୁଦୃଢ ରହୁ ସମ୍ବନ୍ଧ ।
ଅବସର ଦେଖି ହେବି ଉପସ୍ଥିତ
କଥା ମୁଁ ଦେଇ ରଖୁଛି
ପ୍ରାଣପ୍ରିୟାକୁ ମୋ ପ୍ରୀତିଭରା ସ୍ନେହ
ସତ୍ଇଚ୍ଛା ଜଣାଉଅଛି ।