ପ୍ରତାରଣା
ପ୍ରତାରଣା
ପ୍ରବୃତ୍ତି ମାର୍ଗରେ ଯାତ୍ରା କରୁ କରୁ
ଅନ୍ତରେ ପ୍ରବେଶ ଦୃଶ୍ୟ
ନିସ୍ତେଜ ଶରୀରେ ଯୁବକ ଅଚେତ
ଆକଣ୍ଠେ ତାହାର ବିଷ ।
ଉଚ୍ଚ ଶିଖିତର ଡିଗ୍ରୀ ହାତେ ଧରି
ଲୋଟିଛି ଧରଣୀ କୋଳେ
କେତେ ଜନ ଆସି କ୍ଷଣେ ମାୟା କରି
ଆପଣା ରାସ୍ତାରେ ଚଳେ ।
ସିଦ୍ଧ ହସ୍ତ ନେଇ ଆସି ଥିଲା ଧାଇଁ
କର୍ମ କ୍ଷେତ୍ର ଅନ୍ୱେଷଣେ
ଧନ ମୂଲ୍ୟ ବିନା ପୁରଣ ହୁଏନି
ଏ କଥା କି ସିଏ ଜାଣେ ?
ବନ୍ଦ ଆଖି ପତା କହି ଦିଏ କଥା
କେତେ ସ୍ଵପ୍ନ ତାର ସାଥେ
ଦାୟିତ୍ବ ପାଳନେ ଆପାଦ ମସ୍ତକ
ପରିବାର ଘେନି ମାଥେ ।
ଅଯୋଗ୍ୟ ଅସିଦ୍ଧ ଏତେ ଜ୍ଞାନ ଶିକ୍ଷା
ଦାୟୀ ସିନା ହାତ ଗୁଞ୍ଜା
ଯିଏ ଭରି ଦିଏ ଟେବୁଲ୍ ତଳରେ
ସେହି କର୍ମଜୀବି ରାଜା ।
ଅର୍ଥ ପ୍ରଲୋଭନେ ପଡ଼ି ନୀଚ ଜନେ
ନିର୍ଣ୍ଣୟ କରନ୍ତି ମନ୍ଦ
କବି ପ୍ରାଣ କିନ୍ତୁ ଲେଖନୀ ମୁନରେ
ଦୂରୀଭୂତ କରେ ଦ୍ଵନ୍ଦ ।