ପ୍ରେମିକା

ପ୍ରେମିକା

::::::::::::

ଆସିଥିଲ ତୁମେ ସପନରେ ମୋର

ହୃଦୟରେ ଗଲ ବସି

ମନ ଉପବନେ ଫୁଲ ଫୁଟିଗଲା

ତୁମେ ହେଲ ବାରମାସୀ I

ଚଇତରେ ତୁମେ ଚଇତି ସପନ

ବଇଶାଖୀ ଝାଞ୍ଜିଖରା

ଆଷାଢ ଆକାଶେ ମେଘଖଣ୍ଡ ତୁମେ

ଶ୍ରାବଣର ବାରିଧାରା I

ଭୋଦୁଅ ମାସର ଭୋଦେଇ ଖରାଲୋ

ବରଷା ବତୁରା ଛାତି

କାଶତଣ୍ଡି ବଣ ଧବଳ ପସରା

ଜୋଛନା ପଖଳା ରାତି I

ଆଶିଣ ମାସର ନିର୍ମଳ ଆକାଣ

"ମା" ଙ୍କର ଆବାହନୀ

କାର୍ତ୍ତିକରେ ତୁମେ ଶିରି ଶିରି ବାଆ

ପଞ୍ଚୁକର ଧର୍ମବାଣୀ I

ମଗୁଶୁର ମାସ ସୁନେଲି କ୍ଷେତଲୋ

କୁସୁମ ବଣର ଶିରୀ

ଚାଷୀକଣ୍ଠେ ତୁମେ ପ୍ରାଣ ଖୋଲା ହସ

ହସୁଥାଅ କିରିକିରି I 

ପୁଷ୍ ପୁନେଇର ଆନନ୍ଦ ଉଲ୍ଲାସ

ମଳିନ ଦିଶଇ ଜହ୍ନ

ମାଘମାସେ ତୁମେ ଆସ ବାଘପରି

ଥରିଯାଏ ଦେହ ମନ I

ଆମ୍ବ ବଉଳର ମଧୁର ମହକେ

ଆସ ଯେବେ ହସି ହସି

ଫଗୁଣେ ମଳୟ ହୋଇ ବହୁଥାଅ

ଛୁଇଁ ଦେଇ ଯାଅ ଛାତି I

ତୁମେ ମୋ ପ୍ରେମିକା ଅଳସୀ ନାୟିକା

ପୀରତିର ଫୁଲବନ

ତୁମ ପାଇଁ ଦେଖେ କେତେ ମୁଁ ସପନ

ଭୁଲିଯାଏ ରାତି ଦିନ I