ପ୍ରଭୁ ମୋର

ଆଖି ଲୁହ ଚକଚକ୍ କରେ ଯେବେ

ଛାତିତଳେ ଭରିଥାଏ କୋହ

ଚୁପଚାପ୍ ଥାଅ ତୁମେ ମୋ ପାଖରେ

ପଦୁଟିଏ କଥା ନାଇଁ କୁହ ।

ହଜୁଥାଏ ମନଗଢା ଭାବନାରେ 

ମନ ମୋର ବୁଝେନାହିଁ ଜମା

ତୁମେ ଥାଅ ନିର୍ବିକାର ପ୍ରଭୁ ମୋର

ସବୁ ଦୋଷ କରିଦିଅ କ୍ଷମା ।

ତୁମେ କେବେ ରାଗନାହିଁ ମୋ' ଉପରେ

କେବେହେଲେ ଦିଅନାହିଁ ଦଣ୍ଡ

ହେ କୃପାଳୁ ସର୍ବଜ୍ଞାତା ପ୍ରଭୁ ମୋର

ତୁମ ଦୟା ସତରେ ଅଖଣ୍ଡ ।

ଘୁଷୁରୀ ମୁଁ କାଦୁଅ ପଙ୍କରେ ଲୋଟେ

ବୁଝିପାରେ ନାହିଁ ତୁମ ସ୍ନେହ

ତୁମଠୁ ଦୂରରେ ଥାଏ ସବୁବେଳେ 

ଧରେ ଆନ ଭାଵନାର ଖିଅ ।

ବୁଝି ମୁଁ ଅବୁଝା ହୁଏ ବାରବାର

ଠିକିଲେ ବି ଶିଖେନାହି ଜମା

ଯିଏ ନାତ ମାରେ ତାକୁ ମନ ଝୁରେ

ମାନେ ନାହିଁ କେବେ ଖାଲଖମା ।

ତୁମେ ସଦା ଥାଅ ପାଖେ ପ୍ରଭୂ ମୋର

କେବେହେଲେ ଛାଡନାହିଁ ହାତ

ତୁମେ ଅଗତିର ଗତି ମୁକ୍ତିଦାତା

ସ୍ଵାମୀ ମୋର ତୁମେ ଜଗନ୍ନାଥ ।

ତୁମେ ପରମ ପ୍ରଶାନ୍ତି ନିମିଷକେ

କରିଦିଅ ସବୁ ଦୁଃଖ ଦୂର

ମନ ବଡଦାଣ୍ଡେ ଥରେ ଆସ ନାଥ

ପ୍ରଭୁ ମୋର ଜଗତ ଠାକୁର ।