ପ୍ରାକୃତିକ ବିପର୍ଯ୍ୟୟ

ଯସ୍ ଝଡ ଦେଖି ଡର ନାହିଁ ବନ୍ଧୁ

ନିଶ୍ଚୟ ଆସିବ ମହି

ମନର ଭିତରେ ଯେଉଁ ଝଡ ଉଠେ

ତାକୁ କେ ପାରିବ କହି ।

କରୋନାରେ ପୁତ୍ର ଯେବେ ହୁଏ ମୃତ୍ୟୁ 

ଛୁଇଁ ନପାରଇ ମାତା

ହୃଦୟରେ ଯେଉଁ ପ୍ରଭଞ୍ଜନ ଆସେ

ସିଏ କି ରଖିବ ସତ୍ତା ।

ନିରିହ ଆଖିରେ ପିତା ଦେଖୁ ଥାଏ

ହୃଦୟରେ ପ୍ରଭଞ୍ଜନ 

କେଉଁଠି ତା ଦେହ ସଂସ୍କାର କରିଲେ

ଛାଟି ପିଟି ହୁଏ ମନ ।

ପୁତ୍ର ଶବ ଯେବେ ହାତକୁ ନ ଆସେ

ପରିବାରରେ ଘୂର୍ଣ୍ଣିଝଡ

ପୁତ୍ର ବଧୂ ବକ୍ଷେ ଝଡର ପ୍ରଳୟ

ସତେ ଭାଙ୍ଗେ ବନ୍ଧବାଡ ।

ଆକାଶେ ମରୁତ୍ ଧରାରେ କରୋନା

କରୁଛି ତାଣ୍ଡବ ଲୀଳା

ଏକ ପରେ ଏକ ଝଡର ସମ୍ମୁଖେ

ନଡରି ଚଳାଅ ଭେଳା ।

ସତର୍କତା ସଦା ଅଞ୍ଚଳେ ବାନ୍ଧିବ

ଦୃଢ଼ ମନୋବଳ ଧରି

ଆକ୍ରମଣ ରୂପି ପ୍ରଭଞ୍ଜନ ଏଠି

ନିଶ୍ଚେଁ ଚାଲି ଯିବ ହାରି ।

ଜୀବନ ଯୁଦ୍ଧରେ ଝଡ ପରେ ଝଡ

ଚାଲି ଥାଏ ପ୍ରତିଦିନ 

କିଏ ସହି ପାରେ ପାଷାଣ ପରିକା

କିଏ ସେ ବାତୁଳ ସମ ।

ବହୁ ଆଡମ୍ବର ଅଦୃଶ୍ୟର ଝଡ

ପରିସ୍ଥିତି ଅସମ୍ଭାଳ

କ୍ଷଣିକେ ବିନାଶେ ଘୂର୍ଣ୍ଣି ରୂପ ନେଇ

ରୋପିବାର ଏହି ଫଳ ।

କୁଳ ନାରୀ ଯଦି କୁଳ ଧର୍ମ ତ୍ୟାଗୀ

ହୁଅଇ ବିପଥଗାମୀ

ନିନ୍ଦା ଅପନିନ୍ଦା ଝଡର ଶ୍ରାବଣେ

ପିତା ଆଖି ଯାଏ ନମି ।

ବିଶ୍ଵାସ ପରଷି ମନ ନେବେ ତୋଷି

ଅସାଧୁ ବୈରାଗୀ ବେଶେ

କାମାତୁର ହୋଇ ଯେଉଁ ଝଡ ଟାଣେ

ମାଟିରେ ଶରୀର ମିଶେ ।

ବିବିଧ ପ୍ରକାର ଝଡର ସ୍ଵରୂପ

ଲେଖନୀ ନପାରେ କହି

ଅନୁଭବି ଜାଣେ ବେଦନା ତାହାର

ଭାବଗ୍ରାହୀ କର ତ୍ରାହି ।