ଦିନ ଚାଲି ଗଲା

ଦିନ ଚାଲି ଗଲା   ବରଷ ବିତିଲା

ନାହିଁ ତୁମ ରୂପ ଦେଖା

ଏତେ ଦିନ ମୁହିଁ   କେମିତି ରହିଛି

ବୁଝିଲ ନାହିଁ ମୋ ସଖା ।

ସ୍ମୃତି ଶିଳାପରେ    ସଜାଇ ରଖିଛି

ତୁମ ସ୍ନେହ ପ୍ରୀତି ଯେତେ

ନବ ବର୍ଷ ଆସେ   ଖୁସି ସବାରିରେ

ଆନନ୍ଦ ଲାଗେନା ମୋତେ ।

ମନର କଥାକୁ   ଗୋପନ ରଖି ମୁଁ

ବାଢୁ ଥାଏ ଶାନ୍ତି ବାର୍ତ୍ତା

ହୃଦୟରେ ତୁମେ   ପ୍ରାଣର ଈଶ୍ଵର

ତୁମେ ମୋର ହର୍ତ୍ତା କର୍ତ୍ତା ।

କିଛି ତ ଦରବ     ମାଗୁଣି ରଖିନି

ମନ ଭୁଲାଇବା ପାଇଁ

ନୟନେ ଯେ ରୂପ ଦୃଶ୍ୟ ହେଉ ଥାଏ

ତୁମ ଛବି ଝଲସଇ ।

ନିଶି କୋଳେ ବସି  ଲୋତକ ବରଷି

ଚାହିଁଛି ତୁମରି ରାହା

ପ୍ରେୟସୀ ପରାଣ   ବୁଝ ପ୍ରାଣ ଧନ

ତୁମ ବିନା ନାହିଁ ସାହା ।