ନିଷିଦ୍ଧ ପ୍ରେମର ପରିଭାଷା

ଅଲିଭା ଛବି ମୁଁ ସ୍ଵପ୍ନ ଅପେକ୍ଷାରେ, 

ନିଦ୍ରାବିହୀନ ତୁମ ନୟନରେ,

ବାନ୍ଧିବ ଯାହାକୁ ବାହୁର ବନ୍ଧନେ,

ନିଶିରେ ତୁମେ ଅତି ଗୋପନରେ I

ଅଭିସାର କିଛି ଏମିତି ବି ଥାଏ,

ଭୁଲିବାକୁ ହୁଏ ସବୁ ଲାଜକୁ, 

ନିଷିଦ୍ଧ ପ୍ରାନ୍ତରେ ପାଦ ଦେଇ ପରା,

ଫେରି ହୁଏନା ପୁଣି ସମାଜକୁ I 

ଦୂରେ ଥାଇ ତେଣୁ ମନର ମିଳନେ,

ଖୋଜ ନିତି ତୁମେ ମୋ ନିବିଡ଼ତା,

ମୁଁ ହୁଏତ ଏକ ଅଭିଶପ୍ତ ଅଗ୍ନି,

କରିବ ଦଗ୍ଧ ମୋର ସମୀପତା ।

ତୁମ ପ୍ରଶ୍ଵାସର ଅସୀମିତ ସ୍ରୋତ, 

ହୋଇ ନ ପାରେ ବାର୍ତ୍ତା ମହକର,

ତୁମ ଏକାନ୍ତର ମୁଁହିଁ ଏକା ସାକ୍ଷୀ ,

ହୋଇ ନ ପାରେ ଶେଜ ଗୋଲାପର I 

ମୋ ବିନା କିପରି କରିବ ଶିଥିଳ,

ହୃଦରେ ଜ୍ଵଳନ୍ତ ପ୍ରେମ ନିଆଁକୁ

ସିକ୍ତ ହେବ ତାହା ମୋ ଆଲିଙ୍ଗନରେ,  

କହି ନ ପାର ଏହି ଦୁନିଆଁକୁ ।