ଘର ଚଟିଆ ଲାଗି ବସାଘର

ଘର ଚଟିଆଟି ଆତୁର ହେଲାଣି, 

ଧାନ ଖଳାରୁ କେବେଠୁଁ ଗଲାଣି,

ଛଣ ଚାରିଖଣ୍ଡ ଦିଶୁନାହିଁ ଆଉ,

ବସା ବାନ୍ଧିବାକୁ ମନ କଲାଣି I 

ଖରା ବରଷାର ବଦଳିଛି ରୂପ, 

ଶୁଖୁଛି ଗାଆଁର ପୋଖରୀ କୂପ 

କାଠି କୁଟା ମାଟି ସବୁଥିରେ ବିଷ,

ଖାଦ୍ୟର ପୁଣି ବଦଳେ ସ୍ଵରୂପ I 

ଦିଶୁନାହିଁ ଆଉ ଝଙ୍କାଳିଆ ଲଟା, 

ଜଙ୍ଗଲ ବନାନୀ ହେଉଛି କଟା,

କେଉଁଠି ଲୁଚିବ ବାଆ ବତାଶରେ,

ବିନା କାରଣେ ହେବ ହଟହଟା I 

ଭଙ୍ଗା ସ୍ଵପ୍ନ କିଛି ତା' ଆଖିରେ ନେଇ, 

ଦୁଃଖରେ ବସିଛି ଟିକି ଚଢ଼େଇ,

ଗଢ଼ିବ ତାହାର ସୁନାର ସଂସାର 

କାଠ ବାକ୍ସଟିଏ ଦିଅ ବଢ଼େଇ ।।