ନାତୁଣୀ ଉଵାଚ
ନାତୁଣୀ ଉଵାଚ
ମଲ୍ଲିକା ମୋର ନାମ ଦେଇଛ
ଜେଜେ ଡାକୁଛ ମିଲି l
ଜେଜୀ ମୋ ଡାକେ ଅନାରକେଲି
ବାପା ଡାକନ୍ତି ଗେଲି ll
ମାଆ ଡାକନ୍ତି ଅତି ସ୍ନେହରେ
ନାମଟି ମୋର ସ୍ନେହା l
ମୋହର ଯେତେ ଜଞ୍ଜାଳ ସହେ
ସେଇଟି ମୋର ମାଆ ll
ଅଜା ଡାକନ୍ତି ଆଲୋ ମୋହର
ସୁନ୍ଦରୀ ଶିରି ରାଧା l
ଆଈର ମୁହିଁ ବିଶ୍ୱ ସୁନ୍ଦରୀ
ଅଜାକୁ ଦେବି ବିଧା ll
ସାନ ଜେଜୀ ମୋ ଦେଇଛି ନାମ
ଶୁକ୍ଳ ଦ୍ଵିତୀୟା ଚାନ୍ଦ l
ନାତୁଣୀ ମୋର ହୃଦୟ ହାର
ନ ଜାଣେ କିଛି ଛନ୍ଦ ll
ପିଉସୀ କହେ ଝିଅ ଆମର
ଏକ ଅମୂଲ୍ୟ ହୀରା l
ଅମୁଲ୍ୟ ମଣି ଗୁଣର ଖଣି
ସବୁ ନୟନ ତାରା ll
ଜେଜେଙ୍କ ସାଥି ସଙ୍ଗାତଙ୍କର
ସୁନ୍ଦରୀ ମୁଁ ମଲ୍ଲିକା l
ଗେହ୍ଲା କରନ୍ତି ଜେଜେ ମୋ କେତେ
କୋଳରେ ଧରି ଏକା ll
ସବୁରି କଥା ଶୁଣି ମୁଁ ଖାଲି
ହସଇ ଖିଲି ଖିଲି l
ଖାଇ ଶୋଇକି ଅଳସ ଭାଙ୍ଗେ
ମୁଁ କାଳେ ଗୋଟେ ଢୋଲି ll
ରଙ୍ଗ ରଙ୍ଗେଇ ଚଙ୍ଗ ଚଙ୍ଗେଇ
ନାଆଁଟି ମୋର ମଲ୍ଲି l
ଶଙ୍କି ବିଲେଇ ଦିନରେ ଶୁଏ
ରାତିରେ ଯାଏ ବୁଲି ll
ସଭିଙ୍କୁ ମୋର ନମସ୍କାର
ଆଶିଷ ଦିଅ ଢାଳି l
ବିଦ୍ୟା ବୁଦ୍ଧିରେ ପ୍ରବୀଣ ହେବି
ପ୍ରଭୁ ପୟରେ ଅଳି ll