ଗୁରୁଶିଷ୍ୟ ସମ୍ପର୍କ

ଗୁରୁ ବ୍ରହ୍ମା ଗୁରୁ ବିଷ୍ଣୁ ମହେଶ୍ୱର

          ଈଶ୍ବରଙ୍କ ଅବତାର,

ଗୁରୁ ମା ବାପା ଶିକ୍ଷକ ସୁଜନ

          ବନ୍ଧୁ ସଖା ସହୋଦର l

ଗୁରୁ ଆଦି ଇତି ଗୁରୁ ଏହି ସୃଷ୍ଟି 

         ଗୁରୁ ଯେ ପରମ ବ୍ରହ୍ମ,

ଗୁରୁ ବିନେ ଜୀବ ନିର୍ଜୀଵ ସମାନ 

          ବ୍ୟର୍ଥ ଏ ମନୁଷ୍ୟ ଜନ୍ମ l

ଗୁରୁ ଆଶୀର୍ବାଦ ଦିଅଇ ଜୀବନେ

           ଜୟ ବିଜୟର ମାର୍ଗ ,

ଗୁରୁ ସେବା କରି ଜଗତେ ସୁଲଭି 

           ପ୍ରାପ୍ତ ହେବା ପୁଣ୍ୟ ସ୍ବର୍ଗ l

ଗୁରୁ ତୁମେ ମୋର ଅଜ୍ଞାନ ରୂପକ 

            ଅନ୍ଧାରକୁ କଲ ଦୁର,

ଭରିଦେଲ କେତେ ସ୍ବପ୍ନ ଓ ସାହସ 

          ଜିଣିବାକୁ ଏ ସଂସାର l

ମୋ ଚଳାପଥର କଣ୍ଟା ଯେତେ ଥିଲା 

          ହଟେଇଲ ଜ୍ଞାନାଲୋକେ,

ସର୍ବ ଶ୍ରେଷ୍ଠ ପୂଜ୍ୟ ତୁମେ ହିଁ ତ ଗୁରୁ 

            ଏହି ସମଗ୍ର ଭୂଲୋକେ l

ତୁମ ସୁସଂସ୍କାର ସଦାଚାର ପାଇଁ 

         ଆସେ ମନେ ସୁବିଚାର,

ତୁମ ସ୍ନେହ, ଶ୍ରଦ୍ଧା ଅଜାଡ଼ି ଦେଇଛ 

         ମୋ ପ୍ରତି କେତେ ପ୍ରକାର l

ଅସାଧ୍ୟେ ସାଧନ ଅକର୍ମରେ କର୍ମ

          ହୁଏ ନାମ ଧରୁ ଧରୁ,

ସଫଳର ପଥ ଦେଇଛ ତୁମେ ତ

         ସଦା ଶ୍ରେଷ୍ଠ ପୂଜ୍ୟଗୁରୁ l

ଶବ୍ଦ ନାହିଁ ତୁମ ପ୍ରଶଂସା ନିମନ୍ତେ 

         ତୁଲ୍ୟ ପାଇଁ ଦ୍ରବ୍ୟ ନାହିଁ,

ଗୁରୁ ଶିଷ୍ୟ ସମ୍ପର୍କ ଅଟେ ଯେ ମହାନ

            ରହୁ ଚିରଦିନ ପାଇଁ l