ଗରଜିଲା ମେଘ ବରଷେ ନାହିଁ

ଘଡ ଘଡ ଘଡ ଗରଜଈ ମେଘ 

ଲାଗଇ ଆସିବ ଝଡ଼,

ବିଜୁଳି ଚମକେ ଚଉଦିଗ ସାରା 

ଦେଖି ଲାଗିଯାଏ ଡର l

ସମୀର ଦଉଡ଼େ ହଡ଼ବଡ଼ ହୋଇ 

ଦୋହଲାଇ ଦିଏ ଧରା,

ଦେଖୁ ଦେଖୁ କିଛି କ୍ଷଣକ ମଧ୍ୟରେ 

ମହୀରେ ପଡଇ ଖରା l

ଲାଗୁଥିଲା କିଛି ମୁହୂର୍ତ୍ତକ ପାଇଁ 

ହୋଇଯିବ ବର୍ଷାପାତ,

ମୃତ୍ତିକାରେ ଆଦ୍ରପଣ ଆସିଗଲେ 

ବୀଜ ହେବ ତହୁଁ ଜାତ l

କରିବେ ଭକ୍ଷଣ ନାନା ଦ୍ରବ୍ୟ ମାନ 

ନିଜେ ଚାଷକାର୍ଯ୍ୟ କରି,

ଦୁର୍ଦଶା କଟିବ ସୁଦଶା ଆସିବ 

ଦୁଃଖ ଦିନ ଯିବ ସରି l

ଏହି ବର୍ଷା ପରି ଆମ ରାଜନୀତି 

ଆଇନ ଓ ଗଣତନ୍ତ୍ର,

ଜନତାଙ୍କୁ ନିଜ ଆୟତେ ରଖନ୍ତି 

ଦିଅନ୍ତି ସୁବିଧା ମନ୍ତ୍ର l

ଦେଇଥାନ୍ତି କେତେ ପ୍ରତିଶୃତି ତଥା 

ଉଚ୍ଚ ସ୍ଵରେ ସମ୍ଭାଷଣ,

କାମ ସରିଗଲେ ଗରିବ ଲୋକଙ୍କୁ 

ଦିଅନ୍ତି କେତେ କଷଣ l

ରାସନ ଓ ଭତ୍ତା ମାଗଣା ଯୋଜନା 

ପାଉନାହିଁ ଯେଉଁ ଲୋକ,

ତାଙ୍କ ନିକଟକୁ ଯାଆନ୍ତି ନେତାଏ 

ମାଗିଥାନ୍ତି ଭୋଟ ଭିକ l

ହାତ ଯୋଡି ପାଦେ ପଡି ନେତାମାନେ 

କହି ଥାନ୍ତି ମିଠା କଥା,

ଭୋଟ ସରିଗଲେ ସବୁ ସରିଯାଏ 

କାହାକୁ ନ ନୁଁଏ ମଥା l 

ଉତ୍କୃଷ୍ଟ ଶାସନ ଆମ ଗଣତନ୍ତ୍ର 

ଶାସିତ ହେଲେ ଶିକ୍ଷିତ,

ନିଜ ରାଜନେତା ନିଜେ ହିଁ ବାଛିବ 

ନ ହୋଇ କାହାରି ମିତ l

ସବୁ ତ ଏଇଠି ବିରାଡ଼ି ବୈଷ୍ଣବ 

ଖେଳୁଛି ତରାଜୁ ଖେଳ

ଯେଉଁଆଡେ ଟଙ୍କା ସେଇ ଆଡେ ମୁହଁ 

ସରିଗଲେ ହରିବୋଲ l