ମଧୁ ଜୟନ୍ତୀ
ମଧୁ ଜୟନ୍ତୀ
କ୍ରମେ ମଧୁ ଅନ୍ତେ ଆସିଲା
ଜଗତେ ଗ୍ରୀଷ୍ମ କାଳ l
ସତ୍ୟଭାମା ପୁରେ ଜନ୍ମିଛି
ପୁତ୍ର ପଡ଼େ ଚହଳ ll
ଘୋର ଅନ୍ଧକାର ଉତ୍କଳେ
ସର୍ଵଦିଗେ ବ୍ୟାପିଛି l
ମଧୁ କୈଟଭାରୀ ଜନ୍ମିଲେ
କିବା କାଳଉପେକ୍ଷି ll
ଗ୍ରହବିପ୍ରେ ଡାକି ରାଇଲେ
ପିତା ଶ୍ରୀରଘୁନାଥ l
କୋଷ୍ଠି ଗଢ଼ି କୁହ ଏ ପୁତ୍ର
ମୋର ହେବ କେମନ୍ତ ll
ଜ୍ୟୋତିଷ ବୋଲନ୍ତି ଏ ପୁତ୍ର
ଶୁଭ କ୍ଷଣେ ଜନମ l
ନାମ ରଖ ତୁମେ ପୁତ୍ରର
ବାବୁ ମଧୁସୂଦନ ll
ପାଠ ପଢ଼ି ଚାଟ ହୋଇବ
ଦିନେ ପୁତ୍ର ତୁମ୍ଭର l
କୋଟି ମଧ୍ୟେ ଗୋଟି ହୋଇବ
ନିଶ୍ଚେ ସେ ଯଶସ୍କର ll
ଜାତି ନନ୍ଦିଘୋଷେ ସାରଥୀ
ହୋଇ ଯଶ ଅର୍ଜିବ l
ମାତୃ ଭୂମି ମାତୃ ଭାଷାର
ପାଇଁ ବହୁ ଲଢ଼ିବ ll
ସଂସାର ବିରାଗୀ ହୋଇବ
ଧନେ ଲୋଭ ନଥିବ l
ଓଡ଼ିଆଙ୍କ ମଧ୍ୟେ ବଢ଼ିଆ ଉଡ଼େ
ସେ ବୋଲାଇବ ll
ବଡ଼ ହେଲା କ୍ରମେ ସେ ପିଲା
ବହୁ ପାଠ ପଢ଼ିଲା l
ମଧୁ ବାରିଷ୍ଟର ବୋଲାଇ
କଳାଘୋଡ଼ା ଚଢ଼ିଲା ll
ଜାତି ନନ୍ଦିଘୋଷ ଲଗାମ
ହାତେ କଷି ଧଇଲା l
ଡାକିଲା ଉଠରେ ଓଡ଼ିଆ
ତୁମ୍ଭ ରାତି ପାହିଲା ll
ଶୋଇ ଅଛ କିଆଁ ସୁଖରେ
ମାରୁ ଅଛ ଘୁଙ୍ଗୁଡ଼ି l
ମାଆ ବେକେ ତୁମ ପଡ଼ିଛି
କ୍ରୁର ଯମ ଦଉଡ଼ି ll
ଗଙ୍ଗାଠାରୁ ଗୋଦାବାରୀ ତୋ
ମାତା ଆଜି ଖଣ୍ଡିତ l
ମାତା ଚିନ୍ତା ନାହିଁ ମରମେ
ବୋଲାଉଛ ପଣ୍ଡିତ ll
ନୀଳଚକ୍ର ତଳେ ହୋଇବା
ଆସ ସର୍ବେ ଏକତ୍ର l
ଜାତି ନନ୍ଦିଘୋଷ ଚାଳିବା
ଆହୁତି ଦେବା ସ୍ବାର୍ଥ ll
ମଧୁବାଣୀ ଶୁଣି ମଧୁର ଜାଗି
ଉଠି ସରବେ l
ପୁରିଲା ଆକାଶ ପୃଥିବୀ ଜାତି
ରାଗିଣୀ ରବେ ll
ଏହି ଥିଲେ ମଧୁସୂଦନ ଆମ
ଗର୍ବ ଗୌରବ l
ଓଡ଼ିଆ ପୁଅଟେ ଆଉକେ ତାହା
ପରି ହୋଇବ ll
ଧନ୍ୟ ଲୋ ଉତ୍କକ ଜନନୀ
ଧନ୍ୟ ମଧୁସୂଦନ l
ପୁତ୍ର ଧରି ଥିଲୁ କୋଳରେ
ଜାତି କୁଳ ନନ୍ଦନ ll
ଉତ୍କଳରେ ମହା ପରବ ଆଜି
ମଧୁ ଜୟନ୍ତୀ l
ଉତ୍କଳର ସୂର୍ଯ୍ୟ ସୋଉର୍ଯ୍ୟ ଖାଲି
ମନେ ପଡ଼ନ୍ତି ll