ଜାନକୀ ଜନ୍ମ

    

ଜନକପୁରୀରେ ବାଜେ ମଙ୍ଗଳ ମହୁରୀ l

କନକ ବରଣୀ ସୀତେ ଛନ୍ତି ଅବତରୀ ll

କେତେ କାଳ ତପ କରି ରାଜର୍ଷି ଜନକ l

ଭୂମି କର୍ଷି ପାଇଛନ୍ତି ଦିବ୍ୟ କନ୍ୟା ଏକ ll

ମହା ଉଲ୍ଲାସରେ ମହାରାଣୀ, ସୁନୟନା l

ବାଣ୍ଟୁଛନ୍ତି ଖିରି ମିଠା ନାନା ପିଠା ପଣା ll

ମହା ଆନନ୍ଦରେ ଶ୍ରୀ କନକ ମହାରାଜା l

ଦାନ ଦ୍ୟନ୍ତି ଅନ୍ନ ବସ୍ତ୍ର ବାଜୁଅଛି ବାଜା ll

ଲକ୍ଷଧେନୁ ସ୍ୱର୍ଣ୍ଣ ରାଜା ବିପ୍ରଙ୍କୁ ବାଣ୍ଟିଲେ l

ରତନ ପାଇଛି ଭାଗ୍ୟବାନ ମୁଁ ଭୁତଳେ ll

ନାମକରଣେ ବୋଇଲେ ଗ୍ରହବିପ୍ର ଆସି l 

ସର୍ଵସୁଲକ୍ଷଣୀ ତୁମ୍ଭ କନ୍ୟା ଲକ୍ଷ୍ମୀଅଂଶୀ ll

ସିଆରୁ ଜନମ ଯେଣୁ ନାମ ତାର ସୀତା l

ପାର୍ଥିବୀ ପୃଥିବୀ ସୂତା ବିଦେହ ବନିତା ll

ଜନକ ଦୁହିତା ନାମ ଜାନକୀ ତା ହେବ l

ପତିବ୍ରତା ସତୀ ଭାଗ୍ୟେ ବିଷ୍ଣୁଙ୍କୁ ବରିବ ll

ଦୁଃଖିନୀ କପାଳ ସୁଖ ଲେଶନାହିଁ ତାର l

ପତିବ୍ରତା ସତୀ ବୋଲି ପୂଜିବ ସଂସାର ll

ଦକ୍ଷିଣା ପାଇ ସନ୍ତୁଷ୍ଟେ ଗ୍ରହବିପ୍ରେ ଗଲେ l

ଜନକପୁରରେ ସତୀ ଝୁଲୁଛନ୍ତି ଦୋଳେ ll

ଜନକ ପୁରୀରୁ ଏବେ ଫେରୁଛି ମୁଁ ଭାଇ l

ମଜାମାରି ଖଜା ମାତ୍ର ଦୁଇଗୋଟି ଖାଇ ll

ନମାମି,ନମାମି ସୀତେ, ନମାମି, ନମାମି l

ଜଗତ ଜନନୀ ଆଜ ଶ୍ରୀସୀତା ନବମୀ ll