କୃପାକର କୃପାମୟୀ

 

ମାଆ ନାମ ଯେଉଁ ଦୁଇଟି ଅକ୍ଷର 

   ଜଗତେ ଦୁର୍ଲ୍ଲଭ ସେହି l

ମାଆର ଚରଣ ଭଜିଲେରେ ମନ

    ଚତୁର୍ବର୍ଗ ଫଳ ପାଇ ll

ମାଆ ଜନ୍ମଦାତ୍ରୀ ମାଆ ଜଗଦ୍ଧାତ୍ରୀ 

  ତାପରି ଆଉ କେ ନାହିଁ l

ସନ୍ତାନ କଷଣ ଦେଖିଲେରେ ମନ 

   ନେତ୍ରୁ ନୀର ବହୁଥାଇ ll 

ସେହି ମା ବିରଜା ବିମଳା ଗିରିଜା 

   ନାମେ ଯା ଧ୍ଵଜା ଉଡ଼ଇ l

ଆପଦେ ବିପଦେ ଶରଣ ତା ପଦେ 

   ଧ୍ୟାନ ମୋର ରହିଥାଇ ll 

ଜଗତ ଦେଖିଲି ଜଠରେ ତାହାର 

    ଦଶମାସ ଗର୍ଭ ରହି l

କରୁଣାମୟୀ ମୋ ମାଆ ବଢ଼ାଇଲା 

   ବକ୍ଷର ଅମୃତ ପେଇ ll 

ମାଆକୋଳ ମୋର ଅଭୟ ଆଶ୍ରୟ 

   ଆଶ୍ରା ତା ପଣତ ଛାଇ l

ମାଆ ମାହେଶ୍ୱରୀ ପରମ ଇଶ୍ୱରୀ 

   ଅମ୍ବିକା କାଳିକା ସେହି ll 

ଇତିହାସେ କଥା ଶିବା

Advertisement

ଜୀ ମରାଠା 

   ମାଆ ତାଙ୍କ ଜୀଜାବାଈ l

ମାତୃ କୃପା ବଳେ ଜଗତ ଜିଣିଲେ 

   ଭବାନୀ କୃପାଣ ପାଇ ll 

ମାଆ ନାମ ସାର ଏ ଭବ ସାଗର 

   ନାବ ପାରିହେବା ପାଇଁ l

ମାତୃନାମ ଭେଳା କରରେ ପାଗଳା 

    ସଂସାର ଜିତିବୁ ତୁହି ll

ମାଆ ମୋ ମଙ୍ଗଳା ସନ୍ତାନ ବତ୍ସଳା 

   ମଙ୍ଗଳେ ମଙ୍ଗଳମୟୀ l

ମାତୃକୃପା ଭିକ୍ଷା କରରେ ତୁ ଦୀକ୍ଷା 

   ବଡ଼ ଆଉ କିଛି ନାହିଁ ll

ଭୀଷଣ କାନ୍ତାରେ ଭବ ପାରାଵାରେ

   ଅନ୍ଧକାରେ ବୁଲୁ ଥାଇ l

ମାଆଲୋ ଦୟୀନୀ ତୁହି ନାରାୟଣୀ 

   ସୁପଥ ଦେବୁ ଦେଖାଇ ll 

ମାଆ ତୋ କରୁଣା ନ କରିବୁ ଉଣା 

    ଚରଣ ବନ୍ଦଇ ମୁହିଁ l

 ମୁଢ଼ ଅକୀଞ୍ଚନେ ମୁରୁଖ ଅଜ୍ଞାନେ 

    କୃପାକର କୃପାମୟୀ ll