Library
Profile
ପ୍ରୟାଗେ ଚାଲିଛି କୁମ୍ଭ ଯାତରା
ପ୍ରୟାଗେ ଚାଲିଛି କୁମ୍ଭ ଯାତରା
ଚାଲ ଚାଲ ଭାଇ ମକରା l
ପ୍ରୟାଗେ ଚାଲିଛି କୁମ୍ଭଯାତରା ll
ପବିତ୍ର ଏ ଯୋଗ ଭାଗ୍ୟଥିଲେ ଭୋଗ
ମରତେ ପରବ ଅଟେ ନିଆରା ll
ଚାଲ ଚାଲ ଭାଇ ମକରା....
ସାଧୁ ସନ୍ଥ ଲାଗିଲା ଭିଡ଼ l
ସଙ୍ଗମରେ ପବିତ୍ର ବୁଡ଼ ll
ଦେଶ ବିଦେଶରୁ ଛୁଟିଛନ୍ତି ଭକ୍ତେ
କୁଆଁସିଆ ପାଗ ନରମ ଖରା ll
ଚାଲ ଚାଲ ଭାଇ ମକରା...
ଗଙ୍ଗା ଯମୁନା ସରସ୍ୱତୀ l
ସଂଗମରେ ମିଳି ଅଛନ୍ତି ll
ସଙ୍ଗମ ଜଳରେ ବୁଡ଼ ପକାଇବା
ମୁକତିଧାମ ସେ ମୋକ୍ଷ ପସରା ll
ଚାଲ ଚାଲ ଭାଇ ମକରା....
ପୁରାଣରେ କଥା ବର୍ଣ୍ଣିତ l
ଦିନେ ମିଳି ଦେବ ଦଇତ୍ୟ ll
ମନ୍ଦର ଦଣ୍ଡରେ ସମୁଦ୍ର ମନ୍ଥିଲେ
ତହିଁରୁ ଅମୃତ ସମ୍ଭବ ପରା ll
ଚାଲ ଚାଲ ଭାଇ ମକରା....
&nb
sp; ରାକ୍ଷସଙ୍କୁ କରି ବଞ୍ଚିତ l
ବିଷ୍ଣୁ ହରିନେଲେ ଅମୃତ ll
ଅସୁରେ ଛଡ଼ାଉଁ ତିନି ବୁନ୍ଦାମୃତ
ଧରଣୀରେ ତିନିସ୍ଥାନେ ପଡ଼ିଲା ll
ଚାଲ ଚାଲ ଭାଇ ମକରା ...
ପ୍ରୟାଗରାଜ ହରିଦ୍ଵାରେ l
ନାସିକ ଓ ଉଜ୍ଜୟୀନୀରେ ll
ଗୋଦାବରୀ ବୁଡ଼ ସିପ୍ରା ଗଙ୍ଗା ବୁଡ଼
ସଂଗମରେ ସ୍ନାନ ମୁକ୍ତିପସରା ll
ଚାଲ ଚାଲ ଭାଇ ମକରା...
ମିଳିଲେଣି ସାଧୁ ସମାଜ l
କର ଭାଇ ଗଣ୍ଠିଲି ସଜ ll
କୁମ୍ଭରେ ସ୍ନାହାନ, ବଟ ପ୍ରଦକ୍ଷିଣ
ଶୀତଳ ଛାଇରେ ନପଡ଼େ ଖରା ll
ଚାଲ ଚାଲ ଭାଇ ମକରା...
ଜୟ ଜୟ ଜୟ ଭାରତୀ l
ଗଙ୍ଗା ଯମୁନା ସରସ୍ୱତୀ ll
ସିପ୍ରା ଗୋଦାବରୀ, ବନ୍ଦଇ ଜନନୀ
ଆରତ ଭଞ୍ଜନୀ ଦୁଃଖ ପଶୋରା ll
ଚାଲ ଚାଲ ଭାଇ ମକରା....
