ସୀମା ରେଖା

ନୀଳ ଆକାଶର ବିହଙ୍ଗ ବୁଝେନା

କେଉଁଟି ତା ସୀମା ରେଖା

ସ୍ୱଚ୍ଛନ୍ଦରେ ଉଡ଼େ ଦେଶରୁ ଦେଶକୁ

ଜାଣି ଆମେ ଅଣ ଦେଖା ।

ପବନ ବୁଝେନା ଜାତି, ଧର୍ମ, ବର୍ଣ୍ଣ

ଜାଣେନା ଗରିବ ଧନୀ

ମାନ ଅଭିମାନ ଛନ୍ଦକୁ ଲଗେଇ

ହେଉ ଆମେ ଛନ୍ଦା ଛନ୍ଦି ।

ସୂରୁଜ, ଚନ୍ଦ୍ରମା କିରଣ ବୁଣ‌ଇ

ଏ ସାରା ବିଶ୍ବ ଉପରେ

ନିଜ ଛାୟା ଦେଖି ନିତି ଡରି ମରୁ

ଆମେ ଏ ଧରା ପୃଷ୍ଠାରେ ।

ବିଚିତ୍ର ସୃଷ୍ଟିର ବିଚିତ୍ର ଏ ଜୀବ

ପାଇଛି ଉପାଧି ଶ୍ରେଷ୍ଠ

ସବୁଠାରୁ ବୋଧେ ଏଇ ଦୁନିଆରେ

ପାଉଅଛି ବେଶି କଷ୍ଟ ।