ମୁଁ ତୁମର ପ୍ରିୟ ସୂଚନାଟିଏ
ମୁଁ ତୁମର ପ୍ରିୟ ସୂଚନାଟିଏ
ସାଧନାର ପଥ କଢାଇ ନେବାକୁ
ମୁଁ ତୁମର ପ୍ରିୟ ସୂଚନାଟିଏ
ସଫଳତା ଶିଡି଼ ସେ ପାରଇ ଚଢ଼ି
ମୋହର ସ୍ବରୂପ ବୁଝଇ ଯିଏ ।
ଯେବେ ବୋଧଗମ୍ୟ ମୋର ପରିଭାଷା
ରହେ ନାହି କିଛି ଅକରଣୀୟ
ଇଚ୍ଛାଶକ୍ତି ଆଉ ପ୍ରଚେଷ୍ଟା ବଳରେ
ହୁଏନି ସମୟ ବି ଅପଚୟ ।
ଠାର ଇଙ୍ଗିତରେ ହେଉ ବଚନରେ
ଅବା ଲିଖନରେ ଯାହା ସୂଚିତ
ସେଥିପ୍ରତି ଧ୍ୟାନ ଦିଏ ଯେଉଁ ମନ
ସ୍ବଚ୍ଛ ତା' ପାଖେ କଅଣ ଉଚିତ ।
ନବୁଝି ଯେ ଧାଏଁ ବିନା ବିଚାରରେ
ହୁଅଇ ସଦା ସେ ଅକୃତକାର୍ଯ୍ୟ
ଅଳପ ବୁଝି ଯେ ଭାବେ ସବୁ ଜାଣେ
ବିଫଳତା ତାହା ପାଇଁ ନିଧାର୍ଯ୍ୟ ।
ସରଳ ଜଟିଳ ସଦା ମୋର ଭାବ
ଶୁଣଇ ଠିକ୍ ଯେ କର୍ଣ୍ଣପଟଳେ
ଧୈର୍ଯ୍ୟ ସହ କରି ସବୁ ସମାଧାନ
ବିଜେତା ନିଜର ବିଶ୍ବାସ ବଳେ ।