ନମଃ ନମଃ ବିଶ୍ୱଧାତ୍ରୀ

ଦଶ ପ୍ରହର ଧାରିଣୀ ନମସ୍ତେ ଗିରିଜା l

ନମସ୍ତେ କରୁଣାମୟୀ ମାତ ଦଶଭୁଜା ll

ଅବିଦ୍ୟାନାଶିନୀ ମାତ ତୁହି ଦଶବିଦ୍ୟା l

ତିନିରୂପ କାଳି ତାରା ଷୋଡ଼ଶୀ ପ୍ରସିଦ୍ଧା ll 

ଭୁବନେଶ୍ଵରୀ, ଭୈରବୀ ମାତ ଛିନ୍ନମସ୍ତା l

ଯୋଗ୍ନିଗଣେ ତୃପ୍ତକଲୁ କାଟି ନିଜ ମଥା ll

ଧୂମାବତୀ ବଗଳା ମାତଙ୍ଗୀ ମା କମଳା l

ନୃମୁଣ୍ଡମାଳିନୀ ଗଳେ ଲମ୍ବେ ମୁଣ୍ଡମାଳା ll

ପାର୍ବଣ ଋତୁ ମାଆ ଲୋ ପର୍ବ ଦଶହରା l

ଦିବ୍ୟଧାମୁ ଓହ୍ଲାଇ ମା' ଆସିଥିଲୁ ଧରା ll

ଦଶ ପାପ ହାରିଣୀ ମା' ଦନୁଜ ଦଳିନୀ l

ବିଶ୍ଵଜନନୀ ଅମ୍ବିକେ ବିଶ୍ଵ ବିନୋଦିନୀ ll

ସ୍ନେହବୋଳା କଥାମାନ ଗଲୁ ମାଆ କହି l

ସନ୍ତାନରେ ସ୍ନେହବହି ମାଆ ସ୍ନେହମୟୀ ll

କରୁଣାମୟୀ ଜନନୀ ତୁ ଦୁଃଖ ପଶୋରା l

ମାଆବିନା ଆହା ପଦ କେ କହିବ ପରା ll

ଅଭୟ ଆଶ୍ରୟ ମାଆ ତୋ ପଣତ କାନି l

ଶିର ମୋର ମଣ୍ଡୁଥାଉ ତୋ ଚରଣବେନି ll

ଦିବ୍ୟଧାମେ ମାତ ଆଜି ଯାଉଅଛୁ ଫେରି l

ସନ୍ତାନଙ୍କୁ ନଦେବୁ ମା ମନରୁ ପାଶୋରି ll

ନମସ୍ତେ ନମସ୍ତେ ମାଆ ସତ୍ୟ ସନାତନୀ l

ନମଃ ନମଃ ବିଶ୍ଵଧାତ୍ରୀ ଜଗତକାରେଣୀ ll