ଆଧୁନିକ

କାଳର ଅଧୀନ ମରତ ଭୁବନ

ଆସଇ ପରିବର୍ତ୍ତନ

ଆଧୁନିକ ଦିନେ ବେଶ ବଦଳାଇ

ହୋଇଯାଏ ପୁରାତନ ।

ଆଧୁନିକ ପୁଣି ଅତି ଆଧୁନିକ 

ରୂପରେ ଯାଏ ବଦଳି

ମାନବ ଏଠାରେ ସମୟ ବଶରେ

କର୍ତ୍ତବ୍ୟକୁ ଧରେ ତୋଳି ।

ଚାଲିଚଳନଠୁ ଆଚାରବିଚାର

ଖାଦ୍ୟପେୟ ବେଶଭୂଷା

ସବୁଥିରେ ଦିଶେ ଆଧୁନିକ ଛାପ

ବଦଳିଯାଏ ବି ଭାଷା ।

କଳଲଙ୍ଗଳଠୁ ଯେତେ ଯନ୍ତ୍ରଯାନ

ଯନ୍ତ୍ରାଦି ଉପକରଣ

ଅଳ୍ପ ପରିଶ୍ରମେ ଅଳ୍ପ ସମୟରେ

କର୍ମକୁ କରେ ସାଧନ ।

ଦିନୁଦିନ ହୁଏ ବି ପରିବର୍ତ୍ତନ 

ଆମ ଚିକିତ୍ସା ବିଜ୍ଞାନ

ସେଥିପାଇଁ କେତେ ନୂଆନୂଆ ଯନ୍ତ୍ର

ହେଉଅଛି ଉଦ୍ଭାବନ ।

ଚନ୍ଦ୍ର ଏବେ ଆମ ହାତ ପାହାନ୍ତାରେ

ପାରିଛୁ କି ଧରି ସତେ

ମିଳେ ଅନ୍ତରୀକ୍ଷ ସମ୍ବନ୍ଧୀୟ ତଥ୍ୟ

ବୈଜ୍ଞାନିକଙ୍କଠୁ କେତେ ! 

ଇଣ୍ଟରନେଟ ଯୁଗେ ବସି ଘରେ ଘରେ

ସମସ୍ୟାର ସମାଧାନ 

ପୃଥିବୀକୁ ଛୋଟ ବନାଇ ଦେଇଛି

ଏରୋପ୍ଲେନ ସ୍ମାର୍ଟଫୋନ ।

ଯେତେ ବର୍ଣ୍ଣିଲେ ବି ଆଧୁନିକ ଗାଥା

ହୋଇବ ପୋଥି ପୁରାଣ

ତା' ସାଥିରେ ତାଳ ଦେଇ ଚାଲୁଥିଲେ

ପୂର୍ଣ୍ଣ ଲାଗିବ ଜୀବନ ।