ମା ଭବାନୀ

ଦୁର୍ଗତି ନାଶିନୀ ଜୟ ମା ଭବାନୀ

ଦୁର୍ଗା ରୂପେ ମା ଆବିର୍ଭୂତ,

ମା ଆଗମନେ ପୁର ପଲ୍ଲୀରେ ଆଜି

ତୋରଣ ହୋଇଛି ସଜ୍ଜିତ ।

ବିପଦ ହାରିଣୀ ଦୁଷ୍ଟ ବିନାଶିନୀ

ଶରତେ ଆସିଛୁ ମରତେ,

ଭିନ୍ନ ପୀଠରେ ଭିନ୍ନ ନାମରେ ମାଗୋ

ପୂଜା ପାଉ ସାରା ଜଗତେ ।

ଉଲ୍ଲସିତ ମନେ ସ୍ବାଗତ ଜଣାଇ

ବସୁଧା ମେଲିଛି ପସରା,

ବନ ଉପବନେ ନାନା ଫୁଲ ଫୁଟି

ଝୁମି ଝୁମି ନାଚୁଛି ପରା ।

ବାଜେ ଭେରୀ ତୂରୀ ମୃଦଙ୍ଗ ମହୁରୀ

ସବୁଠି ଶୁଭେ ଘଣ୍ଟା ଶଙ୍ଖ,

ହେ ମା ଶୈଳପୁତ୍ରୀ ଶକ୍ତି ସ୍ବରୂପିଣୀ

ହରି ନେବୁ ସଭିଙ୍କ ଦୁଃଖ ।

ସ୍ନେହମୟୀ ମାଗୋ ତୁ ମମତାମୟୀ

ଦଶଭୁଜା ସିଂହବାହିନୀ,

ଆଦ୍ୟାଶକ୍ତି ମହାମାୟା ମହାସତୀ 

ତୁହି ମା ସୁଖ ପ୍ରଦାୟିନୀ ।

ମହିଷା ମର୍ଦ୍ଧିନୀ ଜଗତ ଜନନୀ

ଡାକୁଅଛି ମା ତୋତେ ଭକ୍ତ,

ସବୁ କଷ୍ଟ ରୋଗ ଶୋକ ଦୂର କରି

ଶତ୍ରୁକୁ କରିବୁ ନିପାତ ।

ରକ୍ଷା କାରିଣୀ ତୁ ଅଭୟ ଦାୟିନୀ

ଖର୍ପର ଧାରିଣୀ ପାର୍ବତୀ,

ହୃଦୟରେ ମୋର ଦିବ୍ୟ ଜ୍ୟୋତି ଭରି

ଜୀବନେ କରିଦେ ପ୍ରଗତି ।

ଜୟ ମା ଭବାନୀ ଜଗତ କଲ୍ୟାଣୀ

ଜୟ ମା ତ୍ରିପୁରା ସୁନ୍ଦରୀ,

ପବିତ୍ର ଆଶିଷ ଦେ ମା ମହାସତୀ

ଏତିକି କରୁଛି ଗୁହାରୀ ।