କେଉଁଦିନୁ ମୁହିଁ ଯାଇନାହିଁ ପୁରୀ
କେଉଁଦିନୁ ମୁହିଁ ଯାଇନାହିଁ ପୁରୀ
କେଉଁଦିନୁ ମୁହିଁ ଯାଇ ନାହିଁ ପୁରୀ
ଖାଇନାହିଁ ଖିରି ପୁରୀ l
ମାଆ ହାତରନ୍ଧା ଅବଢ଼ା ଡାଲମା
ଅମୃତ ନୋହିବ ସରି ll
ଅମାଲୁ ଗଇଁଠା ନାନାଜାତି ପିଠା
ଖିରି ଶାକର ଆରିସା l
ସର ରସକେଳୀ ରାବିଡ଼ିି ଚକୁଳି
ମାଆଙ୍କ ହାତ ପରସା ll
ଚୌଷଠି ବ୍ୟଞ୍ଜନ ମାଆ ପ୍ରତିଦିନ
ରାନ୍ଧନ୍ତି ବିଷ୍ଣୁଙ୍କ ଭୋଗ l
ଛଅ ତିଅଣକୁ ନଅ ଭଜା ଖଞ୍ଜା
ଖଞ୍ଜନ୍ତି ଛପନ ଭୋଗ ll
ସତେ ହେବ ସାହା ବଳିୟାର ବାହା
ସେବନେ ଭାଗ୍ୟ ହୋଇବ l
କରିଛି ଭରସା ପୁରିବ ମୋ ଆଶା
ଡୋରି ତୋହର ଲାଗିବ ll
ଜୟ ଜୟ ମାଆ ଜଗତ ଜନନୀ
ଜୟ ମା ଶ୍ରୀକ୍ଷେତ୍ର ଶିରି l
ଜୟ ଅନ୍ନପୂର୍ଣ୍ଣା ଜୟ ଲୋ ସମ୍ପୂର୍ଣ୍ଣା
ଆଶା ଯିବ ମୋର ପୁରି ll
ଧନ୍ୟ ଧନ୍ୟ ମାଆ ସିନ୍ଧୁ ରାଜଜେମା
ଧନ୍ୟ ଲୋ ଓଡ଼ିଆ ମାଆ l
ଓଡ଼ିଆଙ୍କ କଥା ବିଶ୍ୱେ କହି ମାଆ
ଶ୍ରୀକ୍ଷେତ୍ରରେ ରହି ଥାଆ ll