ମନେପଡେ ଆଜି ସେ ପିଲାଦିନ
ମନେପଡେ ଆଜି ସେ ପିଲାଦିନ
ସକାଳର ଡାଏରୀରେ
ଆଜିର ସାଏରୀ
ଅତୀତର ସ୍ମୃତିକୁ ସତେ
ପାଆନ୍ତିକି ଫେରି ।
ସମୟସ୍ରୋତରେ ଆଜି
ପରିବର୍ତ୍ତିତ ଏ ଜୀବନ
ମନେପଡେ ମୋର
ସେହି ସୁନ୍ଦର ପିଲାଦିନ।
ଚକ୍ ଖଡି ସିଲଟରୁ
କାଗଜ କଲମର ଯାତ୍ରା
ମାଆର କାହାଣୀ ଆଉ
ବର୍ଣ୍ଣବୋଧ ଯୁକ୍ତାକ୍ଷରମାତ୍ରା ।
ବରଗଛ ଓହଳରେ କେତେ
ଖେଳୁଥିଲୁ ଦୋଳି
ଲୁଚାଇଖାଇଛୁ ଆମ୍ବ ,ପିଜୁଳି
ଆଉ ବାଡ଼ି ବରକୋଳି ।
ବରଷାଦିନେ ଚାଳ ଓଳିତଳେ
କାଗଜଡଙ୍ଗା ଭସା
ଖରାବେଳେ ଛୋଟବାଛୁରି ପଛେ
ଧାଇଁବାର ନିଶା ।
ବିଦ୍ୟାଳୟରେ ଶିକ୍ଷକଙ୍କ
ସେ ଲମ୍ବା ବେତର ଛାଟ
ଆଉ ବାପାବୋଉଙ୍କର
ସ୍ନେହଭରା ତାଗିଦ୍ ଆକଟ ।
ମନେପଡେ ପିଲାଦିନ ସ୍ମୃତିର
ସେ ଅଫେରା ବେଳ
ଅପରାହ୍ନେ ସାଙ୍ଗସାଥି ମେଳେ
କବାଡି , କ୍ରିକେଟ ଖେଳ ।
ସ୍ଵାବଲମ୍ବି ହେବା ପଥେ ବଢିଚାଲିଛୁ
ସମୟର ଅନ୍ତରାଳରେ
ଆଜି ମଧ୍ୟ ବ୍ୟସ୍ତତାର କୋଳାହଳେ
ସ୍ମୃତିସବୁ ଭାସଇ ମନରେ ।