ନିଜ ଦେହ ପାଇଁ ହେବା ବଇଦ

ବୁଝାଇ କହୁଛି ଶୁଣ ହେ ପିଲାଏ

ନିଜ ଦେହ ପାଇଁ ହେବା ବଇଦ

ରୋଗଦୁଃଖ ଯେତେ ଡିଆଁ ମାରୁଥିବେ

ମନରେ ନଥିବ ଟିକିଏ ଖେଦ ।

ଈଶ୍ବର ଆମକୁ ଦେଇଛନ୍ତି ଦେହ

ତା' ମାଧ୍ୟମେ ଭଲ କରିବା ପାଇଁ

ଯତନେ ତାହାକୁ ରଖିଲେ ସଜାଇ

ସିନା ଭଲକାମେ ମନଟି ଥାଇ ।

ଋତୁଚକ୍ରେ ବୁଲି ଦେହ ପାଇଥାଏ

ଭିନ୍ନତା ଭିତରେ ଅଶେଷ କଷ୍ଟ

ତା' ସହିତ ଆମେ ଖାପଖୁଆଇ

ଚଳି ଯାଇଥାନ୍ତି ହୋଇ ସନ୍ତଷ୍ଟ ।

ଗ୍ରୀଷମ ଋତୁଟି ଆସିଲା ପାଖେଇ

ପ୍ରକୃତି କୋଳରେ ଜଳ ଅଭାବ

ଦେହ ପାଇଁ ଜଳ ଅତି ଆବଶ୍ୟକ

ନମିଳିଲେ ରୋଗ ଗ୍ରାସ କରିବ ।

ଗ୍ରୀଷମ ତାତିରେ ଯେଉଁଠିକୁ ଯିବା

ସଙ୍ଗରେ ଧରିବା ପାଣି ବୋତଲ

ଜୋତା ଆଉ ଛତା ଓଦା ଗାମୁଛାଟେ

ତା' ସାଥିରେ ଥିଲେ ହେବଟି ସଲ ।

ଆବଶ୍ୟକବେଳେ ପିଉଥିବା ଜଳ

ବଇଦ ଭାବରେ ହୋଇକି ସଜ

ଛୁଇଁ ପାରିବନି ଅଂଶୁଘାତ ରୋଗ

ଦେହ ସବୁବେଳେ ଥିବ ସତେଜ ।

ଘୋଳଦହି ପୁଣି ଲେମ୍ବୁ ସରବତ

ପ୍ରତି ଘରେ ସଜ ଗ୍ରୀଷମେ ଜାଣ

ଜଳୀୟ ଅଂଶ ନକମି ଦେହରୁ

ସବୁବେଳେ ଜ୍ୟୋତି ବିରାଜମାନ ।

ବରଷା ଋତୁରେ ମାଛି ଭଣଭଣ

ଖାଉଥିବା ନିତି ଉଷୁମ ଖାଦ୍ୟ

ହଇଜା ଜୀବାଣୁ ଭୟେ ଥରୁଥିବେ

ପାଖେ ପଶିବାକୁ ହେବ ଦୁର୍ଭେଦ୍ୟ ।

ନିଜକୁ ଭିଜାଇ ଓଳି ପାଣି ଧାରେ

ଭସାଇବ ନାହିଁ କାଗଜ ଡଙ୍ଗା

ଥଣ୍ଡା ଜ୍ବରରେ ଭୋଗିବ ଯନ୍ତ୍ରଣା

ନରଖିବ ଯେବେ ଦେହକୁ ନିଘା ।

ଶୀତୁଆ ଜାଡ଼ରେ ପାଣିକୁ ନଡରି

ନିଇତି ଗୋଧୋଇ ଦେହକୁ ସଫା 

କାଛୁ କି କୁଣ୍ଡିଆ ପାଖ ମାଡ଼ିବେନି 

ଦିଶୁଥିବା ସଦାସର୍ବଦା ତୋଫା ।

ବରଷକଯାକ ସଫା ପିନ୍ଧୁଥିବା

ନଖରେ ମଇଳା ରଖିବା ନାହିଁ

ରୋଗର ଘରଟି ଆମ ଏହି ଦେହ

ସୁସ୍ଥତା ଆଭାସ ଥିବଟି ଦେଇ ।

ମୁଣ୍ଡରେ ଉଙ୍କୁଣୀ ଯେପରି ନହେବେ

ରଖିବା କେଶକୁ ସଫାସୁତର

ନହେଲେ ରକତ ଶୋଷୁଥିବେ ପୁଣି

କୁଣ୍ଡେଇ କୁଣ୍ଡେଇ ହେବା ଅଧୀର ।

ପାଇଖାନା ପାଇଁ ଜୋତା ବ୍ୟବହାର

ପଡ଼ିଆ ଭୂଇଁରେ ମଳ ନତେଜି

ସ୍ବଚ୍ଛ ପରିବେଶ ଗଠନ କରିବା

ନିଜ ଶରୀରକୁ ନିଜେ ହିଁ ବୁଝି ।

ଅଳିଆ ଖାତକୁ ଘରଠାରୁ ଦୂର

ନାଳନରଦ୍ଦମା ରଖିବା ନାହିଁ

ଖାଲଖମା ଯେତେ ପୋତି ପକାଇବା

ମଶାଙ୍କ ଦାଉରୁ ସୁରକ୍ଷା ପାଇଁ ।

ବାଡ଼ିବଗିଚାରେ ନାନା ଗଛ ପୋତି

ବିଶୁଦ୍ଧ ରଖିବା ବାତାବରଣ 

ସାଇକେଲ ଚଢ଼ି ଯାତାୟାତ କଲେ

ହ୍ରାସ ନ ହୋଇବ ଅମ୍ଳଜାନ ।

କମ୍ପୋଷ୍ଟ ଖତର କରି ବ୍ୟବହାର

ନାନା ଫଳ ଫସଲ ଉପୁଜାଇ

ସୁଷମ ଖାଦ୍ୟକୁ ଖାଉଥିଲେ ନିତି

ଦେହଠୁ ରୋଗ ରହିବ ଦୂରେଇ ।

ଯୋଗ ବ୍ୟାୟାମର କରିଣ ଅଭ୍ୟାସ

ସକାଳ ସଞ୍ଜରେ ଚାଲିବା ବାଟ

ଖାଦ୍ୟପେୟ, କାମ ଠିକ୍ ସମୟରେ

ସୃଷ୍ଟିରେ ସାଜିବା ଉତ୍ତମ ଚାଟ ।

ପରିବେଶ ରଖି ସ୍ବଚ୍ଛ ଆମର

ସୁସ୍ଥତା ଗୀତ ଲହରୀ ତୋଳି

ମା' ମାଟି କୋଳେ ସୁସ୍ଥେ ଜୀଇଁବା

ପଡ଼ିବ ହରଷେ ମନ ଉଛୁଳି ।।