ଶିଶୁ ଗୀତ

ବଣ ପାହାଡରେ ସିଂହ ରହଇ

ପଶୁମାନଙ୍କର ରାଜା ବୋଲାଇ ।

ବାଈଚଢେଇର ବସା ସୁନ୍ଦର

ଝଡ ବରଷାକୁ ନଥାଏ ଡର ।

ଥୁକୁଲଥାକୁଲ ରୁମୁରୁମିଆ

ଭାଲୁ ନାନୀଟି ଭାରି ଅଳସୁଆ ।

ସବୁଠୁ ସୁନ୍ଦର ପକ୍ଷୀ ମୟୂର

ଇନ୍ଦ୍ରଧନୁ ପ୍ରାୟ ପୁଚ୍ଛ ତାହାର ।

ଦେଖ ଏ ହରିଣ ତରକା ଅତି

ଧାଇଁ ପଳାଏ ସେ ଗଲେ ତା' କତି ।

କିଚିରିମିଚିରି ଶବଦ କରେ

ଘରଚଟିଆଟି ଘର ଭିତରେ ।

ଲମ୍ବା ଲମ୍ବା ଅଟେ ମେଣ୍ଢାର ଲୋମ

ସେ ଲୋମର ନାମ ଅଟେ ପଶମ ।

ଗଛ ଡାଳେ ଲୁଚି କୋଇଲି ଗାଏ

କୁହୁକୁହୁ ତାନେ ମନକୁ ମୋହେ ।

ବିଶ୍ବାସୀ ପ୍ରାଣୀ ତା' ନାମ କୁକୁର

ଘ୍ରାଣ ଶକ୍ତି ତା'ର ଅତି ପ୍ରଖର ।

ନାଲିଆ ଥଣ୍ଟକୁ ବେକ ନାଲିଆ

ମଣିଷ ପରିକା କହଇ ଶୁଆ ।

ଅମୃତ ସମାନ ଖିର ଗାଈର

ଦହି, ଛେନା, ଘିଅ, ରାବିଡି, ସର ।

କା' କା' କରି କାଉ ରାବଇ

ପରିବେଶ ଆମ ସଫା ରଖଇ ।