ଝୁଲୁଛି ସୁନା ମୋ

ଝୁଲୁଛି ସୁନା ମୋ ଫୁଲର ଦୋଳିରେ

ହୋଇ ନୂଆ ସଜବାଜ

କେତେ ଖୁସି ଆଣି ବରଷକେ ଥରେ

ଆସିଛି ରଜ ମଉଜ ।

ଲାଗୁନି ମୋ ସୁନା ପାଦ ତ ମାଟିରେ

ପିନ୍ଧିଛି ନାଲି ଅଳତା

ରଖିଛି ଘୋଡାଇ କୋମଳ ପତରେ 

ପଡିବନି ରଙ୍ଗ ଫିକା ।

ଫୁଲି ଉଠେ ସୁନା ମନଟି ଆମର

ଖାଇ ପିଇ ବାଆ ପାଣି

ଗାଏ ସୁନା ମିଠା ରଜଦୋଳି ଗୀତ

ଆ ମିତ ବର୍ଷା ରାଣୀ ।

ସାରୁ ଗଛ ମୂଳେ ବେଙ୍ଗ ଓ ବେଙ୍ଗୁଲୀ

କରନ୍ତି କେଏଁ କଟର

ପୁଚ୍ଛକୁ ମେଲାଇ କଳାମେଘ ଦେଖି

ନାଚନ୍ତି ବନେ ମୟୂର ।

ଟପର ଟପର ବରଷିଲେ ପାଣି

ଭସାଇ କାଗଜ ଡଙ୍ଗା

ତାଳି ମାରି ସୁନା ଖୁସିରେ ନାଚିବ

କହିବ ଝରୁଛି ଗଙ୍ଗା ।

ଆକାଶକୁ ଚାହିଁ ମନକୁ ଶୁଖାଇ 

ସୁନା ମୋ କରୁଛି ଅଳି

ରୁଚୁନାହିଁ ତାକୁ ମିଠା ପୋଡପିଠା

ଆରିଶା କାକରା କ୍ଷୀରି ।

ଝରୁ ଆମ ସୁନା ମୁହେଁ ରୂପା ହସ

ହସୁ ଆମ ସୁନା କ୍ଷେତ

ହେଉ ଅବପାତ ବରଷୁ ବାରିଦ

ବର୍ଷାରାଣୀ ହୁଅ ପ୍ରୀତ ।