ଏଇ ମାଟି ମୋ ଚନ୍ଦନ

ସରଗଠୁ ବଡ ମାଆ ପରି ମାଟି

ମୁଁ ତାର ଅଟେ ସନ୍ତାନ 

ମାଆ ପାଦଧୂଳି ବିଜୟ ଟୀକା ମୋ

ଏଇ ମାଟି ମୋ ଚନ୍ଦନ ।

ତା ପାଣି ପବନେ କୋଳରେ ସଭିଏଁ

ଛୋଟରୁ ହୁଅନ୍ତି ବଡ

ତା ପଣତ ଛାୟା ଅଭୟ ଆଶ୍ରୟେ

ଗଢିଉଠେ ପରିବାର ।

ସୁଉର୍ବର ମାଟି ସବୁଜ ସୁନ୍ଦର 

ଉପତ୍ୟକା ବିଲବନ

ଯୋଗାଏ ଆହାର ମାଆ ପରି ମାଟି

କରଇ ପ୍ରତିପୋଷଣ ।

ବହେ ନଦନଦୀ ଶୀତଳ ନିର୍ଝର 

ଉଚ୍ଚ ତା ଗିରି କନ୍ଦରୁ

ଫଳଫୁଲେ ଭରା ମାଟି କାମଧେନୁ

ଅନ୍ନପୂର୍ଣ୍ଣା ଲତା ତରୁ ।

ମାଟି ମାଆ ସହେ ଅଳି ଓ ଅର୍ଦ୍ଦଳି

ଜନନୀ ସେ ସର୍ବଂସହା

ସୁକର୍ତ୍ତବ୍ଯେ ଫଳୁ ସୁନାର ଫସଲ

ହସୁ ଆମ ମାଟି ମାଆ ।

ମାଆ ମାଟି ବିନା ନାହିଁ ସୁଖ ଶାନ୍ତି

ଜୀବନର ପରିଚୟ

ମାଟି ମାଆ ସେବା ସମ୍ମାନ ସୁରକ୍ଷା

ହେଉ ମୋର ଲକ୍ଷ୍ଯ ଧ୍ଯେୟ ।