நூலகம்
சுயவிவரம்
ଯୋଡିହୁଏ ନୂଆ ଫର୍ଦ୍ଦ
ଯୋଡିହୁଏ ନୂଆ ଫର୍ଦ୍ଦ
ଜୀବନ ପୁସ୍ତକର ଫର୍ଦ୍ଦ ପରେ ଫର୍ଦ୍ଦ
ଲେଉଟୁ ଥାଏ ପ୍ରତି ମୁହୂର୍ତ୍ତରେ
ଯୋଡି ହୋଇଯାଏ କେତେ ଯେ ନୂଆଫର୍ଦ୍ଦ
ଅଭିନବ କିରଣର ସୁନେଲି ରଙ୍ଗରେ ।
ଜୀବନ ଇତିହାସର ଲିଖିତ କିଛି ପୃଷ୍ଠା
କଣ୍ଟକିତ ଜୀବନ ପଥର ବିଗତ ମୁହୂର୍ତ୍ତ
ପୁଣି କେତେ ପୃଷ୍ଠା ଅଫେରନ୍ତା ସମୟର
ଇନ୍ଦ୍ରଧନୁ ପରି ସପ୍ତ ରଙ୍ଗେ ରଙ୍ଗାୟିତ ।
ବାଲ୍ୟରୁ ଶୈଶବ ଯୌବନରୁ ବାର୍ଦ୍ଧକ୍ୟ
କ୍ୟାଲେଣ୍ଡରର ଫର୍ଦ୍ଦ ପରି ଯାଏ ବଦଳି
ଜୀବନର ଗୋଳାଫେଣ୍ଟା ରୋଟିନ୍ ପରି
ବୟସ ରଫ୍ ଖାତାର ଫର୍ଦ୍ଦସବୁ ଯାଉଛି ସରି ।
ଜୀବନ ଡାଏରୀର ଫର୍ଦ୍ଦକୁ କରି କାନଭାସ
ସଭିଙ୍କ ହୃଦୟେ ଭଲ ପାଇବା ଦେବା ଆଙ୍କି
ଅସୁମାରୀ ସମ୍ଭାବନାର ସୁରୁଜ ଉଇଁବ
ନୂତନ ଫର୍ଦ୍ଦର ସାଧା କାଗଜ ରହିଛି ବାକି ।
ଜୀବନ ପାଣ୍ଡୁଲିପିରେ ବୟସର ଅତଡ଼ା
ସମୟର ସ୍ରୋତରେ ଯାଉଛି ଭାସି
ନୂତନବରଷ ଆଣିବ ନୂତନ ସୂର୍ଯ୍ୟୋଦୟ
ଶାନ୍ତି ସମୃଦ୍ଧିରେ ଜିଇଁବେ ପୃଥିବୀବାସୀ ।
ଅନୁଭୁତିର ପଥରେ ଅଭିଜ୍ଞତା ଇସାରାରେ
ସଙ୍ଘର୍ଷର କାଳିରେ ବର୍ତ୍ତମାନ ହେଉଛି ଲେଖା
ଯୋଡି ହୋଇଯିବ ବୟସର ନୂତନ ଫର୍ଦ୍ଦ
ଭବିଷ୍ୟତର କାହାଣୀ ପାଇଁ ରହିଲା ଅପେକ୍ଷା ।
ଜୀବନ ଜ୍ୟାମିତିରେ ବୟସର ରେଖା
ଶୂନ୍ୟରୁ ଆରମ୍ଭ ହୋଇ ଶୂନ୍ୟରେ ଲୀନ
ସମୀକରଣର ସୂତ୍ର ଇଶ୍ୱରଙ୍କ ଧ୍ୟାନ
ଜଟିଳ ଭଗ୍ନାଂଶର ସରଳ ସମାଧାନ ।
