ମନ ରହିଗଲା ତୁମରି ଠାରେ

ତୁମେ ଆସିଅଛ ପ୍ରାଣ ପ୍ରିୟା

ସରଗ ରାଇଜରୁ ଓହ୍ଲାଇ

କେଉଁ ଏକ ପରୀର ରୂପ ଧରି

ମୋ ଜୀବନର ବସନ୍ତରେ,

ଫଗୁଣର ସମ୍ଭାର ନେଇ

ମନର ଡାଳେ ଫୁଟାଇଛ ହସ ଫୁଲ

ହୃଦୟେ ଭରି ଦିଅ ମହକ

ବୁଣି ଦେଇ ରଙ୍ଗ କେତେ ଚାଲିଗଲ

ମୋ ଆଶା ଭରସା ବିଶ୍ଵାସରେ 

ମନ ରହିଗଲା ତୁମରି ଠାରେ...।

ଉଜାଣି ବହୁଛି ଜୀବନ ଯମୁନା 

ଖେଳିଯାଏ ତରଙ୍ଗମାଳା

ଭାବରେ ଭାବରେ ବାନ୍ଧି ହୋଇ

ପଡିଗଲି ତୁମ ପ୍ରେମରେ ପ୍ରେମରେ,

କି କିମିଆଁ କଲ ତୁମେ ମୋତେ ପ୍ରିୟା

ଚୁମ୍ବକ ପରି ଟାଣି ନେଲ

ମୋ ମନ ରୂପକ ଲୁହାଖଣ୍ଡକୁ ନେଇ 

ଯୋଡି ଦେଲ ତୁମ ମନ ସାଥୀରେ

ମନ ରହିଗଲା ତୁମରି ଠାରେ...।

ପାଶେ ଥିଲ ଲାଗୁଥିଲା ସବୁ ଭଲ

ଜହ୍ନ ରାତିର ଜୋଛନା ପରି ଝଲସୁ ଥିଲ

ଝୁମି ଝୁମି ଆସି ଚୁମି ଯାଉଥିଲ 

ଅଧା ନିଦ ଅଳସର ମଧୁ ମଳୟରେ,

ଆଖିରେ ଆଖିଏ ସପନ ଥିଲା

ରାତି ପାହି ଯାଉଥିଲା

ସପନ ମୋର କେବେ ସରୁ ନଥିଲା

ଅଧା ଭଙ୍ଗା ନିଦରେ ତୁମେ ଚାଲିଗଲ

ମନ ରହିଗଲା ତୁମରି ଠାରେ...।

ଏବେ ଲାଗେ ଚାଲିଗଲେ ପରେ ପରେ

ଦୁନିଆଁଟା ସାରା ଅନ୍ଧାର ଅନ୍ଧାର

ଭଲ ଲାଗେନା କିଛି କଥା କାହାର

ଝୁରି ହୁଏ ତୁମକୁ ଖାଲି ଭିତରେ ଭିତରେ,

ଶୁଭେ କାନେ ତୁମ ପାଉଁଜି ଶବଦ

ଆସୁଛ କି ପ୍ରିୟା ଅଭିସାରିକା ବେଶରେ

ଲାଗେ ମୋତେ ଅଧିର ଅସ୍ଥିର

ପାଶେ ତୁମ ଉଡି ଯିବି ପବନ ବେଗରେ

ମନ ରହିଗଲା ତୁମରି ଠାରେ।