ମହାମହିମ ରାଷ୍ଟ୍ରପତି ଦ୍ରୌପଦୀ
ମହାମହିମ ରାଷ୍ଟ୍ରପତି ଦ୍ରୌପଦୀ
ସୁକନ୍ୟା ଦ୍ରୌପଦୀ ଆମ ରାଷ୍ଟ୍ରପତି
ହସୁଚି ଭାରତୀ ମାଆ
ଇତିହାସ ଫର୍ଦ୍ଦେ ଶୁଭ ଅବକାଶେ
ଲିପିବଦ୍ଧ ହେଲା ନାଁଆ
ଆହାକି ସୌଭାଗ୍ୟ ଉତ୍କଳୀ ମାଆର
ଜନ୍ମ ଦେଇଥିଲା କନ୍ୟା
ଜିଲ୍ଲା ମୟୁରଭଞ୍ଜ କୁସୁମୀ ମଣ୍ଡଳ
ଉପରବେଡାର ଗାଁଆ ।
ଶୁଭ ଲଗନରେ ଜନ୍ମିଥିଲ ବାରେ
ଭଗତ ସିଂଗୋଙ୍କ କୋଳେ
ଜୁନ ମାସର କୋଡିଏ ତାରିଖ
ଊନବିଂଶ ଅଠାବନେ ।
ଦୁଃଖ ସହଚର ଥିଲା ଦ୍ରୌପଦୀର
ଜୀବନର ଅନୁସଙ୍ଗ
ସଂଘର୍ଷମୟୀର ନିଆରା ଜୀବନ
ଦୁଃଖକାଳ ମହାଭାଗ ।
ସ୍ଵର୍ଣ୍ଣିମ ଅଧ୍ୟାୟ ଯୋଡ଼ିଦେଲ ସତ
ବିଶ୍ଵ ଇତିହାସେ ଆଜି
ଆଦିବାସୀ ବାଳା ଦ୍ଵିତୀୟ ମହିଳା
ଭାରତର ରାଷ୍ଟ୍ରପତି ।
ଉପରବେଡାରୁ ରାଇସିନା ଯାଏ
ସବୁଠି ସ୍ମୃତି ଫରଦ
ଆଖ୍ଯାତ ପଲ୍ଲୀରୁ ବିଖ୍ୟାତ ଦିଲ୍ଲୀରେ
ଦରଦୀ ହୃଦୟ ମିତ ।
ଆମ ଗଣତନ୍ତ୍ର ସତରେ ସ୍ଵତନ୍ତ୍ର
ବିଶ୍ଵ ଦରବାରେ ଆଜି
ସର୍ବୋଚ୍ଚ ପଦରେ ଅଭିଷିକ୍ତ ହେଲେ
ଜନଜାତି ସୁକଲ୍ୟାଣୀ ।
ଗରିବ ଆଖିର ସପନ ବିଭବ
ସାକାର ହୋଇଚି ଆଜି
ଧନୀଗରିବର ନାଁହି ଭେଦ ଭାବ
ଉଦାହରଣ ହେଲେ ଦିଦି ।
ଆଶା ଆକାଂକ୍ଷାର ସୁକଲ୍ଯାଣୀ ମାତ
କରୁଚି ମୁଁ ପ୍ରଣିପାତ
ପ୍ରତି ହୃଦୟରେ ରହିବ ଅଚିରେ
ଯଶ ମାନ ହେବ ଖ୍ୟାତ ।
ସ୍ଵାଧୀନତା ପରେ ଜନ୍ମିଥିଲ ତୁମ୍ଭେ
ପଞ୍ଚଦଶ ରାଷ୍ଟ୍ରପତି
ଓଡ଼ିଶା ମାଟିର ସୁଯୋଗ୍ଯା ସୁକନ୍ୟା
ଇତିହାସେ ହବ ଯୋଡି ।