Library
Profile
କୁଆଁର ପୁନେଇଁ
କୁଆଁର ପୁନେଇଁ
ଆଜି କୁଆଁର ପୁନେଇଁ ଲୋ
ଫୁଲ ବଉଳ ବେଣୀ
କୁଆଁରୀ କନିଆଁ ପୂଜା କରୁଛନ୍ତି
ମନରେ ହରଷ ହୋଇ ଗୋ,
ଫୁଲ ବଉଳ ବେଣୀ ।
ଆକାଶରେ ରୁପା ଜହ୍ନ ଲୋ
ଫୁଲ ବଉଳ ବେଣୀ
ଆସ ରମା, ଉମା, ସାବିତ୍ରୀ,ସୁଷମା
କରିବା ଚାନ୍ଦ ପୂଜନ
ଗୋ ଫୁଲ ବଉଳବେଣୀ ।
ଜହ୍ନି ଫୁଲ ର ଆଞ୍ଜୁଳି ଲୋ
ମୋର ସାଙ୍ଗ ସଜନୀ
ସାତଥର କରି ଚାଳକୁ ପକାଇ
ହୁଳହୁଳି ଦେବା ମିଳି ଗୋ
ମୋର ସାଙ୍ଗ ସଜନୀ ।
ଚଉଁରା ମୂଳ ସଜାଇ ଲୋ
ମୋର ସହୀ ସଙ୍ଗାତ
କଇଁ ଫୁଲ ମାଳ ଦେଇ ଣ ଚାନ୍ଦର,
ମନକୁ ଦେବା ଭୂଲାଇ ଗୋ
ମୋର ସହୀ ସଙ୍ଗାତ ।
କଇଁକୁଦେଖିଲେ ଜହ୍ନ ଲୋ
ମୋର ମନର ମିତ
ଖୁସି ଆନନ୍ଦରେ ବିଭୋର ହୋଇଣ
ଦେବେ ଆଶିଷ କଲ୍ୟାଣ ଲୋ
ମୋର ମନର ମିତ ।
ଆଜି ପରା ଲକ୍ଷ୍ମୀ ପୂଜା ଲୋ
ମୋର ସାଙ୍ଗ ସଜନୀ
ପଦ୍ମ ଫୁଲ ଦେଇ ମାଆଙ୍କୁ ପୁଜିବା
ତୋଷ ହୋଇବେ ପଦ୍ମଜା
ମୋର ସାଙ୍ଗ ସଜନୀ ।
ଘରେ, ଘରେ ପିଠା ପଣା ଲୋ
ଫୁଲ ବଉଳ ବେଣୀ
ନୂଆ ଲୁଗାପଟା, ବନ୍ଧୁ ବାନ୍ଧବ ରେ
ପୁରିଛି ଘର ଅଗଣା ଲୋ
ଫୁଲ ବଉଳ ବେଣୀ ।
କୁଆଁର ପୁନେଇଁ ପୁଚି ଲୋ
ଫୁଲ ବଉଳ ବେଣୀ
ଖେଳୁଥିଲେ ପୂଚି ଆନନ୍ଦିତ ହୋଇ
ଜଣା ପଡ଼ିବନି ରାତି ଲୋ
ଫୁଲ ବଉଳ ବେଣୀ ।
ବାଲି ଘରକୁ କରିଣ ଲୋ
ମୋର ସାଙ୍ଗ ସଜନୀ
ପୋଖରୀ ପାଣିରେ ଚାନ୍ଦକୁ ଉଭାଇ
ଆସିବା ଘରେ ଫେରିଣ ଲୋ
ମୋର ସାଙ୍ଗ ସଜନୀ ।
କାର୍ତ୍ତିକେଶ୍ୱରଙ୍କ ଜନ୍ମ ଲୋ
ଫୁଲ ବଉଳ ବେଣୀ
ତାଙ୍କ ପରି ବର ମିଳିବା ପାଇଁ କି
କରିବା ଚାନ୍ଦ ପୂଜନ ଲୋ
ଫୁଲ ବଉଳ ବେଣୀ ।
ଗାଁ ଦାଣ୍ଡେ ଗୀତ ଗାଇ ଲୋ
ଫୁଲ ବଉଳ ବେଣୀ
କୁଆଁରୀ ଝିଅ ଯେ ଖୁସିରେ ପାଳନ୍ତି
ଏହି କୁଆଁର ପୁନେଇଁ ଲୋ
ଫୁଲ ବଉଳ ବେଣୀ ।
